Изарнян, 23 мартыште, театрнан актёржо-влак «Марий Эл» газетын журналистше-влак дене вашлийыныт.
М.Шкетан лӱмеш Марий кугыжаныш драме театрыш ты гана тӱҥ редакторын алмаштышыже Светлана Белкова, сылнымут редактор, поэтесса Зоя Глушкова да культура йодыш дене редактор Юрий Григорьев толыныт ыле да тӱҥалтыште нуно республикыштына эн «шоҥго» газетын эртыме корныжым ушештареныт.
Актёр ден журналист-влак коклаште вашмутланымаш моткоч пайдале лийын. Теве, мутлан, Российын сулло артистше, Марий Элын калык артситше Олег Кузьминых «Марий Эл» газетыште спектакльым аклен возымаш, критика шагал, уке гаяк манын ойлыш.
Российын сулло артисткыже, Марий Элын калык артисткыже Маргарита Медикова журналист-влаклан теве тыгай ойым пуыш: «Самырык-влак театрыште ондак пашам ыштыше артист-влак нерген йӧршын гаяк огыт пале. Мутлан, Иван Матвеев, Альберт Матвеев нерген материалым, кычал муын, моткоч оҥай савыктышым ямдылаш лиеш. Моло нергенат тыгак».
Тыгак вашлиймаште марий йылмым пойдарыме, вияҥдыме шотышто мутланыме. «Тидыжлан актёр-влаклан «Марий Эл» газет полшен кертеш»,— ойлат журналист-шамыч, да поэт-влак З.Дудина ден Ю.Григорьев шке почеламутыштым лудыч. Театр пашаеҥ-влакат почеш ышт код: Маргарита Медикова Зоя Дудинан ик почеламутшым моткоч сылнын йоҥгалтарыш.
Тыгай вашлиймашым театрыште ончыкыжымат эртараш, районлашке усталык вашлиймашыш газет ден театр пашаеҥ-влак пырля лектын кошташ кутырен келшышт.
В.Семёнов
MariUver 