Ӱярня тылзын 20-шо кечынже Угарман областьысе Кстово олаште Марий культур кечe эртен. Марий Эл гыч артист, журналист, поэт, мер еҥ-влак миеныт.
Александр Пушкин лӱмеш книгагудышто калык зал тичак чумырген ыле. «Черемис мландыште тачысе марий-влак дене вашлиймаш поро лийже», — тыгай ой дене почо пайремым верысе Серызе рӱдерым вуйлатыше Надежда Калачева. Тиде саламлымашке Угарман оласе марий землячествым вуйлатыше А.Семятнев, Тоншай марий Юрий Юсупов ушненыт.
Историй шанче доктор Николай Морохин легенда да преданий, вер-шӧр лӱм-влакым шымлыме негызеш ты кундемыште курык марий-влакын илыме нерген ӱшандарыш. Тудын ойлымыж почеш, эше эртыше курымын 50-60 -шо ийлаштыже тыште марий еш-влак лийыныт.
Тыгай шонымашымак верысе кундемзе-влакат пеҥгыдемдат. Нуно йоча жап годым Васильсурск пазарыште, верысе ото воктен ош вургеман калыкым ужмо, «Путёвка в жизнь» киношто Мустафам модшо марий Йыван Кырлам шарныме нерген ойленыт да Сергей Чавайнын «Ото» почеламутшым рушла йоҥгалтареныт.
Кстово оласе калыклан марий муро сем поянлыкым Наташа Пушкина ден А.Иванов йоҥгалтареныт, бард Сергей Щеглов гитара семым луктын, сылнымут аршашым Зоя Дудина лудын. Кидмастар Ираида Степанова марий тӱрын аралтыш улмыж нерген каласкален. Мутланымашым Мер Каҥаш вуйлатышын алмаштышыже Валерий Мочаев вӱден.
Вашлиймаш деч вара марий делегаций Кстово районышто верланыше Черемисское ялыш (снимкыште) миен. Тыште нуным верысе пеле марий еш вашлийын.
Зоя Глушкова
Налмывер: «Марий Эл» газет
MariUver 
Журналист-влаклан палашышт:
— ожно чыла гаяк мари курыкмари лийын — илен Юл эҥерын пурла серыштыже…
Мо марий-влак пеш йӧратат шкеныштым шернурмарийым, моркомарийым, торъялмарийым, курыкмарийым, …рийым ужаш.
Мо, МАРИЙ марий кушкын шуын огыдал мо?!