Шошо дене пырля мемнан деке Ӱярня пайрем толеш. Ты гана тудо Калтаса калыкым поян сийже дене сийлыш.
Кече шыргыжынак ыш ончал гынат, калык тиде районысо ялла гычат погынен ыле. Мӱндыр уна-влакым – Марий Эл Республикысе Шернур район администрацийын культур пöлкажым вуйлатыше Августа Швецовам, Башкортостан Республикысе Калык-влак келшымаш пöрт вуйлатыше Вельмир Азнаевым, «Мишкан» историй да тӱвыра рӱдерын вуйлатышыже Валерий Байбулатовым, тӱвыра автономийын председательже Павел Бикмурзиным да молымат — пайремын тӱҥ сийже – мелна да пура дене вашлийыч.
Кажне ял поселений гычак, манаш лиеш, толшо-влак нуным кидпаша поянлыкышт дене палымым ыштышт да сийыштым тамлен ончаш ӱжыч.
Калтаса ден Шернур район-влак коклаште келшен илыме шотышто вашкылым икмыняр ий ончыч ыштыме. Ты ганат Калтаса район администраций вуйлатыше Равис Нурытдинов да Августа Швецова вашкыл документыште кидпалыштым пыштышт.
Пайрем мурымаш-куштымаш деч посна огеш эрте. Ӱярня пайремыштат Калтаса калык шер теммешке мурыш-куштыш.
М. АЛИКАЕВА
Налмывер: «Чолман» газет
MariUver 
Пайремлан лӱмынак коҥгам чоҥымаш — пеш сай шонымаш. Марий мелна вет коҥгаште кӱэшталтеш да тудо шокшынек вел тамле. Марий Элыште марий пайремым эртарыше-влаклан тиде сай идейым шотыш налаш темлем. Шонем кусараш лийме коҥгам (орва але тер ӱмбалне) чоҥаш сайрак. Мелнажым вет оксалат ужалаш лиеш, садлан иктаж безнесменат тидым шотыш налын «передвижной марий коҥгам» ыштен кертеш 🙂