Шуматкечын, 12 мартыште, Эрик Сапаев лӱмеш Опера да балет театрыште Марий Элын калык артисткыже Светлана Сушкинан бенефисше эртыш. Артистка тиде пайремым шкенжын 65 ияш лӱмгечыжлан пӧлеклен.
Калык ятырак погынен: рӱдолаште илыше-влак веле огыл, тыгак Светлана Сергеевнан шочмо Марий Турек кундемже, пошкудо Параньга район гычат лийыныт. Марий калыкыште веле огыл, финн-угор тӱняштат ынде палыме мурызым саламлаш Озаҥ ола гычат толыныт ыле да ятыр поро шомакым ойлышт.
Сценыш эн ончыч Э.Сапаев лӱмеш Опера да балет театрын вуйлатышыже-влак лектыч да вӱдышӧ солисткыштым шокшын саламлышт. «Кеч-могай мурымат Светлана Сергеевна кӱлеш кӱкшыт марте нӧлталын йоҥгалтара,— мане театрын художественный вуйлатышыже, Марий Элын калык артистше Константин Иванов.— Театрыштына ик марий спектаклят, операт тиде сылне мурызо деч посна ок эрте — «Алдиарыште» ма «Акпатырыште» тудо сылне йӱкшӧ дене калыкым куандара. Лишыл жапыште театрыште эше ик марий премьера лийшаш – тудат С.Сушкина деч посна ок эрте».
Марий Элын культура, печать да национальность-влак паша шотышто министрже Михаил Васютин, Кугыжаныш Погын вуйлатышын икымше алмаштышыже Анатолий Иванов артисткым ӧндал-шупшал саламлышт, сылне деч сылне пеледыш аршашым да саламлымашан папкым кучыктышт.
Марий Турек да Параньга районласе администраций, депутат-влакын районысо погынымашыштын пашаеҥышт, калык артисткым саламлаш лекшыштла, Ида Крылова лӱмешат, С.Сушкина лӱмешат эртарыме фестиваль-влак нерген ойлышт, нуным ямдылымашке да эртарымашке мурызын моткоч кугу надыржым кӱкшын аклышт.
Поро мут йоҥгалте артистка нерген Республикысе театр пашаеҥ-влакын ушемыштын вуйлатышыжын алмаштышыже Нина Пектееван ойыштыжат.
М.Шкетан лӱмеш Марий кугыжаныш драма театрын тӱҥ режиссёржо Роман Алексеев, пӧлекым кучыктышыжла, пошкудо театрын артисткыжлан почеламутым йоҥгалтарыш, а Марий Элын калык артистше Иван Смирнов «Ой, луй модеш…» мурым пӧлеклыш. Марий самырык театрын артистше-влак весела куштымаш дене саламлышт.
С.Сушкинам саламлаш шке жапыштыже интернатыште пырля илыше да ик классыште тунемше-влакат толыныт. Нуно эртыше жапым шарналтышт, а Светлана Сергеевна «классыште эн чот кредалаш йӧратыше лийынам, садланак пений дене «визытан» лийын гын, молыж дене «кумытанымат» шагал огыл налынам» мане. Ынде лӱмлӧ еҥыш савырныше йолташыже-влак лӱмынак тиде каслан возен ямдылыме почеламутым лудыч да интернатын гимнжым йоҥгалтарышт.
Мутат уке, С.Сушкинан родо-тукымжат пайрем деч ӧрдыжеш кодын кертын огыл, эсогыл Ижевск ола гыч лӱмынак толыныт, ятыр пӧлекым, пеледыш аршашым кучыктышт да Марий Элын калык артисткыж дене кугешнена, тукымнам чапландарымыжлан таум каласена, маньыч.
Кум шагатат пеле чоло шуйнышо пайрем касыште саламлыме шомак ятыр йоҥгалте. Йоҥгалте тыгак пеш шуко марий калык муро. Марий куштымаш-шамыч деч посна иктаж-могай пайрем кас эртен кертеш мо? Уке, мутат уке — «Арбор вел» фольклор ансамбль «Лу, коло, кумло…» куштымашым, Карлыган кундемысе удмурт ансамбль шке калыкыштын куштымашыштым ончыктышт. А Э.Сапаев лӱмеш театрын балеронжо ден балериныже-влак «Йӱксӧ» куштымашым, молымат пӧлеклышт.
Лӱмгечым пайремлыше артисткат парымеш ыш код — марий композитор-влакын мурыштымат йоҥгалтарыш, тӱнямбал классика гычат шагал огыл партий йоҥгалте.
В.ЗАХАРОВ
Фотом «Марий Эл» газет гыч налме
MariUver 