М.Шкетан лӱмеш Марий кугыжаныш драма театр ден Константин Иванов лӱмеш Чуваш кугыжаныш академический драма театр коклаште кыл шукертак пеҥгыдемын. Теният нуно апрельыште ваш унала миен савырнаш кутырен келшеныт.
7 апрельыште Чуваший Республикыште Марий театрын кечыже, а 21 апрельыште Марий Эл Республикыште Чуваш театрын кечыже эртат.
Марий артист-влак чуваш пошкудышт дек Владимир Гуркинын шӱлыкан комедийже почеш шындыме «Вучо,- мане,- пӧртылам…» спектакль дене унала каят. Тиде спектакль «Майатул» финн-угор калык театр-влакын VIII тӱнямбал фестивальыштышт ончыкталтын да кӱкшын аклалтын, а актёр Сергей Данилов Иванын рольжым модмылан жюрин посна призше дене палемдалтын.
21 апрельыште Чуваш театр Йошкар-Олаште, М.Шкетан лӱмеш Маий кугыжаныш драма театрыште, марий драматург Арсий Волковын «Оръеҥ мелна» комедийже почеш шындыме «Туй икерчи» спектакльым ончыкта. Тудым Марий Эл искусствын сулло пашаеҥже Василий Пектеев шынден. Чуваш артист-влак спектакльыште шочмо йылмышт дене кутырат, руш йылмыш синхрон йӧн дене кусаралтеш.
Спектакль 18 шагатлан тӱҥалеш.
Вэ ЭС
MariUver 