Марий Элын Культура, печать да национальность-влак паша шотышто министерствыже Республикысе театр пашаеҥ-влакын ушемышт дене пырля тений 11 март гыч 24 март йотке «Театран Йошкар-Ола-2011» лӱман фестивальым эртара. Тидын годымак эн ойыртемалтше актёр, режиссёр да моло пашаеҥлан Йыван Кырла лӱмеш театр премийым пуат.
Мартын латикымше кечынже Г.Константинов лӱмеш Академический руш драма театрыште фестивальым пайремлын почыт. Ты кастенак ты театр П.Кальдеронын «Дама-невидимка» пьесыж почеш шындыме кок действиян комедийым ончыкта.
Фестивальыште Марий Элыште таче пашам ыштыше чыла куд театр тӱрлӧ спектакль дене калык ончыко лектеш. Теве, мутлан, Республикысе курчак театр йоча-влаклан «Репка-Репка» музыка йомакым, «Приключения фунтика» йомак историйым, «Прекрасное далеко» кугыеҥ-влаклан эрыкан илыш гыч сӱретым ончыкта гын, Курыкмарий драма театр М.Ворфоломеевын «Иргод кечы пила анжикта (кома)» фарсшым ямдылен. Марий самырык театрынат репертуарыштыже ты кок арня жапыште оҥай спектакль-влак улыт: А.Арбузовын «Мой бедный Марат» драмыже, Г.Гордеевын «Кунам кӱдырчӧ кӱдырта» сатира комедийже, Т.Минуллинын «Чодыраял Элыксандр» шӱлыкан комедий. Э.Сапаев лӱмеш Марий кугыжаныш опера да балет театрын артистше-влак П.Чайковскийын «Спящая красавица» балетшым, П.Чайковскийын «Пиковая дама» оперыжым ончаш да колышташ темла.
М.Шкетан лӱмеш Марий кугыжаныш театр шошын икымше тылзынжак шке ончышыжо-влаклан у спектакльым пӧлеклӓ американ писатель О.Генрин произведенийже почеш шындыме «Вождь краснокожих» комедийым калык ончыко луктеш. Тиддеч посна В.Абукаев-Эмгакын «Кайыккомбо кашта» да В.Регеж-Гороховын «Кугезе муро» драмышкышт пагален ӱжеш. Иктыже ынде Марий сценыште икмыняр ий ончыкталтеш гын, кокымшыжын премьерыже тений 28 январьыште лийын.
Фестиваль 24 мартыште мучашлалтеш. Ты кастене искусство мастар-влак кугу концертым ончыктат.
Вэ ЭС
MariUver 