Шорыкйол тылзын 25-ше кечынже Йошкар-Олаште Тимофей Евсеев лӱмеш калыкле тоштерыште лӱмлӧ марий фотосӱретче Пётр Васильевын «Идалыкын жапше» посна ончерже почылтын.
Юлсер район, Ярамарий ялеш шочын-кушшо уста марий эше Надежда Крупская лӱмеш пединститутышто тунеммыж годымак фотосӱрет-влакым ямдылаш тӱҥалын. Романтик чонан улмыжлан кӧра тунамсе пӱтынь Совет Ушем мучко эртен, манаш лиеш. Казахстаныштат, Камчаткыштат илен.
А 1991 ийыште Москошто ГКЧП дене кылдалтше событий-влакым фотографийже-влак дене эрелан арален коден. «Хроника тревожных дней. Москва, август 1991 ий» фотовыставкыжат шарналтеш. Фотомастарын пашаже-влак Москваште, тыгак Финляндийыште ончыкталтыныт.
20 наре ий Т.Евсеев лӱмеш да республикысе сӱретсымыктыш тоштерлаште пашам ыштымыж годым моткоч шергакан тӱжем дене фотографий-влакым ыштен, ямдылен — чылажым шотлен пытарашат огеш лий. Тиде — мемнан культурынан шӧртньӧ фондшо.
Фотосӱретчын у ончерыштыже 40 утла фотосӱретым вераҥдыме. Тыште — Марий кундемысе пӱртӱс поянлыкна. Тидыжым мемнан шинча ончылнына фотомастар кумдан почеш. Илышын волгыдыжо путырак чот озалана. Идалыкын сылне теле, шошо, кеҥеж, шыже пагытше веле огыл, а кажне кечын посна татше ончыкталтын. Эр ӱжаран, кечывал волгыдо дене кылдалтше пӱртӱс ойыртемын, кас рӱмбалгын — кажныжын вет шкенжын сылне тӱсшӧ уло. Ялысе пейзажше мочол ямле. А теве яндар каваште — кайыккомбо кашта. Тиде татымат кучен шукташ кӱлын, воза «Марий Эл» газет.
«Марий Эл ТВ»-н Пётр Васильевлан пӧлеклалтше «Кумыл паша» передачыже:
MariUver
MariUver 