Марий Эл кундемым тӱзатыме шотышто эн сай социально-экономический проектлан конкурсым увертареныт.
Тиде конкурс самырык ӱдыр-рвезе-влакым шочмо кундемнам социальный да экономика могырым вияҥдымашке кумылынрак ушнаш таратышаш. Тушко 30 ий деч самырыкрак кумылан чыла ӱдыр ден рвезе, тыгак самырык-влакын мер ушемышт ушнен кертыт.
2011 ий февраль гыч 2012 ий январь марте ик авторак (але организаций) икмыняр проектым куд номинаций дене пуэн кертеш. Нуно чыланат республикым социальный да экономика могырым вияҥдымашке виктаралтыныт. Проектыште самырык-влакым мер-политика йогыныш ушымо, самырык-влак коклаште предпринимательствым вияҥден колтымо, культура да шӱм-чон поянлыкым пойдарыме, самырык-влак коклаште туризмым, спортым вияҥдыме, яра жапым веселан да пайдалын эртарыме, еш да йоча-влакым воспитатлыме шотышто, тыгак демографий политикым шуктымо, илыме вер да коммунальный озанлык, йӧнан да шулдо илыме вер шотышто шке ончалтышым, умылтарымашым почын пуыман.
Конкурс кок йыжыҥ дене эрта. Икымшыже – муниципальный, тудо тений февраль гыч сентябрь марте республикысе районлаште да олалаште шуйна. Тыгодым комиссийлан конкурсышто участвоватлыме нерген йодмашым, проектым да тудым илышыш пурташ мыняр окса кӱлмым, кушеч шийвундым мумым ончыктыман документ-влакым пуыман. Тӱҥ текст ныл лышташ деч кугурак лийшаш огыл. Тыште проект лӱмым, тачысе жаплан келшымыжым, цельжым да задачыжым, могай жапыште эртарымым, илышыш шыҥдарыме йӧным, тудын пайдале улмыжым рашемдыман.
Кокымшо йыжыҥ республика кӱкшытан лиеш. Тудо тений октябрь гыч вес ий январь марте шуйна. Сеҥыше-влакым лач тунам палемдат. Нуныжо вара шке проектыштым аралышаш улыт.
Вэ ЭС.
MariUver 
…комиссийлан конкурсышто участвоватлыме нерген йодмашым, проектым да тудым илышыш пурташ мыняр окса кӱлмым, кушеч шийвундым мумым ончыктыман документ-влакым пуыман…
Документшым куш колтыман? Кӧн ончылно аралыман? Могай ораде тидым возкален? Адак калыкын шижмашыж дене модын, шонымашым (идейым) погеда мо?