Теле толмо дене У 2011 ий окнам тӱкалта. Калык пайремым эртара. Куан шӱлыш дене авалтен марий концерт-влакым онча. Икмынярынже чылт ик тӱсан улыт: мурыжат ик семанак йоҥга, сценыште койыш-шоктышат шинчам ӧрыктара, икмыняр мурызыжо марий йылмыжымат огеш пале улмаш. А теве «У муро» кружокыш коштшо самырык марий ӱдыр-рвезе-влак чоным куандарат: йӱкышт яндар памаш гай, чон гыч йоргыктен лектеш. Нӧргӧ кап-кылышт марий улмышт нерген ойла.
Самырык мурызо-влак Палантай лӱмеш Тӱвыра да сымыктыш колледжыште, Марий кугыжаныш университетыште тунемыт да каныш жапым «У муро» кружокышто эртарат, мураш тунемыт. Кружок вуйлатыше Г.Григорьев самодеятельный композитор-влак А.Мамаев да А.Кузьминых дене пырля ӱдыр-рвезе-влаклан ийготлан келшыше мурым да профессионал кӱкшытан фонограммым ямдылат.
Тыге икмыняр жап Марий тӱвыра рӱдер самырык, мураш тӱҥалше-влаклан кугу сценышке да муро аланышке корным почеш. Рӱдерын помышыж гыч марий мурызо-влак А.Яковлева, В.Матвеев, И.Мамаева да молат шуаралт лектыныт. Опытым Марий рӱдерысе самырык-влаклан каныме касыштат погаш лиеш. Шке йӱк дене мурымым калыкыште эре пагален шогат, у мурым куанен вашлийыт.
«Мураш гына тыршышт», — чулымын ойла Марий тӱвыра рӱдерын методистше Н.Николаева. – А калыкышке лукташ да сценыште шкем пеҥгыдын кучаш ме туныктена.
Теве У ий деч ондак эртыше «У Ий муро» пайрем концерт у сынан лийын. Ончаш толшо калык у мурызо-влак дене пырля Йӱштӧ Кугызан илыме верышкыже логалыныт. Юзо тӱняш миен кошташ Пургыж, Юзо ӱдыр, самырык мурызо-влак (О.Богачева, Ю.Медведева, А.Алмаматов, А.Ямбаршев, К.Семенова, И.Мамаева, Д.Конаков, К.Юркина, М.Чулкова), Студент театр полшеныт.
Ончаш толшо калык муро корныш икымше ошкылым ыштыше-влакым рӱж совым кырен вашлийын. Икмынярынже, илалшыракше, мемнан годым тыгай кружок-влак пашам ыштат гын, мыят кугу мурызо лиям ыле дыр, манын кӧранен шыргыжалыныт.
Г.Ласточкина
MariUver 