15-19 ноябрьыште Марий тӱвыра рӱдер Свердловск кундемысе Красноуфимск районын Приданниково ялыштыже «Шыже да теле жапыште эртаралтше марий йӱла пайрем-влак» регион кокласе семинар-практикумым эртара. Тудо Свердловск да Пермь кундемысе тӱвыра пашаеҥ, марий йылмым туныктышо-влаклан пӧлеклалтын.
Арня жапыште Марий Эл Республик гыч мийыше специалист-влак погынышо-влакым шыже да теле пайрем-влак дене (МарНИИЯЛИ-н кугырак шанче пашаеҥже О.А. Калинина лудеш), пайрем-влаклан келшыше муро (Марий тӱвыра рӱдерын методистше Л.А.Сидоркина), куштымаш (Марий Эл Республикын калык артисткыже Н.А. Макарова), пайрем-влаклан сценарийым возымаш да тудым режиссуро могырым чын шындымаш (Марий Элын сулло артистше В.П. Григорьев) палымым ыштат.
Семинар-практикум «Россий культур» лӱмын ыштыме федерал программе да Марий Эл Республикын тӱвыра, печать да калык-влакын пашашт шотышто министерстве полшымыж дене эртаралтеш.
Марий тӱвыра рӱдер
MariUver 