Самырык театр корныш лектын

Ага тылзын Марий самырык театр Зинаида Долгован «Вис-вис пушан орлыкем» драмыж дене гастрольыш лектеш.

Тиде драмыште кудалтен кодымо икшыве-влакын илышышт, пÿрымашышт нерген ойлалтеш. Нуно шке вийыштлан веле ÿшанен илат, кугыеҥын шинчаштыже порылыкым, умылымашым кычалыт (а вет шукыж годым мöҥгешла веле лиеш), сай ончыкылык нерген шонат…

Спектакльым режиссер, Марий самырык театрын сылныквуйжо, Рушэл сымыктышын сулло пашаеҥже Олег Иркабаев-Этайн шынден, семым Марий Эл Республик сымыктышын сулло пашаеҥже Вениамин Захаров келыштарен. Ончышо-влакым С. Мамаев, И. Актуганов, А. Кожевников, Н. Пашкина, А. Мамаева, Л. Рыбакова, А. Васильев, Н. Четкарева, А. Иркабаев, П. Кожевников куандарат.

Пошкырт кундемыште икымше спектакльым 14 агаште Дöртыльö районысо Йывачъялыште ончыктат, умбакыже кажне кечын Краснокам районысо Маняк, У Пураял яллаште, Коян поселкышто, Калтаса районысо Актуган, Павасола яллаште, Мишкан райрÿдыштö да тиде районысо Тымбай, Чорай яллаште, Янаул районысо У Оръя, Тумна, Рабак яллаште модаш тÿҥалыт.

А. ИВАШКИНА

Налмывер: «Чолман» газет