Марий кугыжаныш университетын Финно-угроведений институтыштыжо Марий талешке кечылан пӧлеклалтше сылнымутан да семан композиций эртен.
Ты жапыштак студент-влакын шанче-практик конференцийышт лийын. Студент-влак, талешке-шамыч нерген возымо произведений-влакым шымлен, концерт деч ончыч пленар заседанийым эртареныт. А.Айгузина «Л.Яндакын «Мамич Бердей» романжын йылмыже» курс пашажым, Е.Васильева «Г.Гордеевын драматургийжын йылмыже» шымлымашыжым, Е.Рыбакова «И.Ломберскийын ойлымашыже-влакын поэтикыже» пашажым калык ончыко аклаш луктыныт.
Ӱдыр-рвезе-влак, талешкына-влакым шарналтен, нунылан пӧлеклалтше почеламутым, муро-влакым йоҥгалтарышт. И.Каменщиковын кӱсле дене шокталтымыже чонышкак шыҥыш, ныжыл кумылым пуртыш. Тыгак тудынак шиялтыш дене шокталтымыж почеш Н.Ельмекееван сылне йӱкшӧ залым шергылтарыш. И.Сидорова ден А.Ильинын весела мурышт калыкым совым рӱж кыраш таратыш. Р.Алексеев ден А.Ильинын мыскара такмакышт почеш ончаш толшо-влак тавалтышт. Мучашлан «Мурсем» ансамбльын йӱксӧ гай ӱдыржӧ-влак сылнын кушталтышт.
А варажым студент-влакын шанче-практик конференцийышт умбакыже шуйнен, 8 секций пашам ыштен.
Л.ШАБДАРОВА
Д.Мухаматгалиевын фотожо
Налмывер: «Марий Эл» газет
MariUver 