20 июньышто, Марий Элын рӱдолаштыже Пеледыш пайрем ден Агавайрем лиеш.
10 шагатлан Йошкар-Оласе Пӱнчерын Тумеротышкыжо республикысе районла гыч онаеҥ-влак чокылмо мутым пелешташ да Агавайрем йӱлам шукташ погынат.
11.30 гыч 12.15 шагат марет В.И.Ленин лӱмеш тӱвыра полат деч Ленин лӱмеш площадьышке район гыч толшо уна-влак эртат.
13 шагаталан Ленин лӱмеш площадьыште Пеледыш пайремым почмаш да концерт лиеш.
15 шагат гыч Пайрем Рӱдӧ каныме паркышке кусна, «Тукым вож» композицийлан у шӱлышым пуаш тыршат. Тиде жапынак Тулото аланыште Марий Элысе фольклор коллектив-влакын концертышт тӱҥалеш.
Изиш варарак Тулото алан воктене марий патыр-влак кучедалаш пижыт, увертара «Марий Эл Радио».
15.30 шагатлан йоча-влакым «Аквариум» кафе шеҥелне «Пиалан йоча пагыт» модыш, конкурс программе вуча. Ты годымак Тулото аланыште калык модыш-влак лийыт.
17.00 шагатлан «Аквариум» кафе шеҥелне «Марий кас» тӱҥалеш.
20.00 шагат гыч Ленин лӱмеш площадьыште «Марий Эл Радион» Марий Танцполжо лиеш. Эстарде мурызо-влакын йоҥгалатрыме мурышт, «Мари Эл Радион» вӱдышыжӧ-влак толшо-влакым канаш, кушташ тараташ тӱҥалыт.
Историйым ончалын каласаш гын, икымше гана тыгай лӱм дене пайремым Совет жапыште, 1920 ийыште драматург Александр Конаковын темлымашыже почеш Шернурышто эртареныт. Тидын деч вара тудо кумдаҥын. Таче кечылан кажне районышто шошо агам пашам мучашлымеке, тыгай пайремым эртарат.
Республикысе «Агавайрем» да «Пеледыш пайрем» эртарыме радам (.doc) >>
MariUver
Денис Речкинын фотосӱретше: Агавайрем кумалтыш годым
MariUver 