Рушэл ойсавыш* кече вашеш Россий журналче* ушемын Марий кундемысе пӧлкажын 2008 ийыште республикысе журналче-влакын эн сай пашаштлан увертарыме таҥасымашым иктешлыме. Тушто лу номинаций гыч нылытыштыже «Марий Эл» газетын журналистше-шамыч палемдалтыныт.
У еҥан жюри конкурсым писын да куштылгын иктешлыш, молан манаш гын ты гана нунын коклаште газетлам эреак лудшо да телерадиоувертышлам* чӱчкыдын ончышо да колыштшо-влак лийыныт. Сандене конкурсыш темлыме паша-влакымат, нунын авторыштымат сайын паленыт. Лийын ӱчашымашат, тыгодым шолып йӱклаш пернен. Иктешлен каласаш гын, профессионал жюри шке пашашт дене премийым чынжымак сулен налше журналче-влаклан палемдаш ыштен.
Кажне ийын сеҥыше-влак радамыште мемнан журналче-влак лийыныт, теният икмынярышт куандарышт. Тидыже — нунын талукаш паша саскаштлан кугу ак.
Эн тӱҥ номинацийыште — «Республикысе печатьыште эн сай паша» номинацийыште — йӧндартыш* да амалкалымаш* йодыш дене редакторна Юрий Исаков сеҥышыш лектын. Нимыняр моктаныде каласем: экономике йӧстыкым* тудын семын чыла велымат келгын да кумдан почын пуышо журналче республикыште пешак шагал, укеат манаш лиеш. Ю.Исаковын возымаштыже вес шöрынжö — лудшо-влакын серышыштышт тарватыме йодышым келгын чыла велымат шымла да республик кӱкшытыштö решатла. Кажне возымыжо почеш мо-гынат ышталтеш. Ик эн кугу опытан пашаеҥна журналистикыште чырык курым утла тырша, кажне ийын республик кӱкшытан премий дене палемдалтеш.
«Йоча ден самырык-влаклан эн сай публикаций» тӱҥ номинацийыште спорт да туныктеж* йодыш дене редактор Елена Яндимирован ямдылен шогымо «Йоча тӱня» лаштыкым палемдыме. Тиде лаштык марий школлаште тунемше йоча-влакын чоныштым савыра, шкеныштымат тушко сераш тарата, сандене возымышт шагал огыл савыкталтеш.
«Марий Эл» газетна шкенан республикысе марий калык йӱлам, тыгак öрдыж кундемлаште тӱшкан илыше марий-влакын йӱлаштым, культурыштым арален кодымылан да вияҥдымылан, финн-угор тӱшкаш пурышо родо-тукым калыкын йӱлажым да тачысе илышыжым ончыктен шогымылан эреак кугу верым ойыра.
Эртыше ийыште ты теме дене мемнан фотокорреспондентна Денис Речкин лым лийде, манаш лиеш, пашам ыштен. Тудын корныжо Башкортостаныш да Татарстаныш, Коми Республикыш да Одыэл* мландыш, Югра кундемыш да шуко моло вереат шуйналтын.
Тыге мемнан лудшына-влак газет страницылаште Д.Речкинын ятыр фоторепортажшым ужын да материалжым лудын кертыныт. Уста фотомастар тыгак öрдыж кундемлаште марий да родо-тукым калык-влакын тачысе илышыштым почын ончыктышо икмыняр фото-ончержым* чумырен. Тудын ӱмашсе пашаже конкурсышто «Калык йӱлалан ӱшанле улмылан» посна номинацийыште премий дене аклалтын.
А Галина Кожевникован лӱмжым лудшына-влак сайын палат, возымыжым чыланат куанен лудыт. Айдемын шӱм-чон ойыртемжым, кызытсе сакналтышан саманыште илен лекшаш верч кучедалмыжым, порылыкым арален кодымыжым почын пуышо артикльже-влакым* эреак вучат. Г.Кожевникова ӱшаныштым шукта.
Уста журналче ондакше ты конкурсын чыла гаяк посна номинацийыштыже сеҥышыш лектын ыле. А ынде теве у ошкыл — «Журналчын пеҥгыдылыкшылан кöра шке ӱмбак нелым налмылан» номинацийыште тудын деч тале лийын огыл. Тиде номинацийыште сеҥышыш лекташ, чынжымак, шке илышлан лӱдыкшымат, нелылыкымат, тӱрлö чаракымат чыташ логалын. Сандене премийжын акше журналчылан шкаланже кок пачаш шергын толын манаш лиеш.
Сеҥышыш лекше журналчына-влакым шокшын саламлена да ончыкыжо пашаштышт эшеат кугу ошкылым ышташ, лудшына-влакым сылне деч сылне артикль да фотокаласкалымаш-влак* дене куандараш тыланена.
Тыгак республикысе конкурсышто ойыртемалтше чыла коллегынам саскале* пашаштышт шумо кугу сеҥымаш дене уло кумылын саламлена, пӱсö перам да у кӱкшытым тыланена. А сеҥышыш теве кöмыт лектыныт:
«Районысо, оласе печатьыште эн сай паша» тӱҥ номинацийыште «Открытый взгляд» газетын корреспондентше О.Салтанова; «Эн сай телевидений программе (передаче цикл)» тӱҥ номинацийыште «Марий Эл» ГТРК гыч Н.Бехтина ден Д.Носов; «Эн сай радиопрограмма (передача цикл)» тӱҥ номинацийыште В.Григорьев; «Эн сай тӱжвал тӱсан газет, журнал (дизайн, фотографий, полиграфий сöрастарымаш)» тӱҥ номинацийыште «Кугарня» газет; «Перан порылыкшо да айдемым утарымылан» посна номинацийыште «Марийская правда» газетын журналчыже О.Бирючева; Тӱвыра ден шӱм-чон поянлыкым угыч нöлталмылан» посна номинацийыште «Марий Эл» ГТРК гыч Н.Бельская ден В.Кудрявцев.
Анатолий АНДРЕЕВ,
конкурсын жюри еҥже
Фотосӱретлаште: Юрий Исаков, Елена Яндимирова интервьюм налеш, Денис Речкин, Галина Кожевникова маска дене.
*Рушэл — Россий, ойсавыш — печать, журналче — журналист, увертыш — передача, йӧндартыш — экономика, амалкалымаш — бизнес, туныктеж — образований, Одыэл — Удмуртий, фото-ончер — фотовыставка, артикль — статья, фотокаласкалымаш — фоторепортаж, саскале — творческий
MariUver 