Йошкар-Олаште арня мучко шуйнышо «Майатул» фестиваль теҥгече шке пашажым иктешлыш. М.Шкетан лӱмеш Марий кугыжаныш театрыш погынен, ойыртемалтше посна актер, коллектив-влакым палемден, вес гана вашлиймешке манын, уна-влак порын чеверласышт.
Финн-угор театр-влакын фестивальышт тений шымше гана эртаралте. А тудо ынде шерым темен шуктен огыл? Риторике шотан тиде йодышем рушарнян «йыргешке ӱстел» йырмутланымаште йöршеш шöрлыш. Уке, шерым темыме огыл, мöҥгешла, режиссер, драматург-влак тудым кумдаҥдыме, ешарыме, келгемдыме нерген мутланат. Тугеже сымыктышын тиде аланыштыже ыштыше-влаклан тудо чынжымак кӱлеш. Тыге гын, мутат уке, тудо умбакыже шуйнышаш, вияҥшаш. Да погынышо-влак ончыкыжо теве могай йодыш йыр пашам ышташ кӱлмö нерген палемдышт:
— фестивальыш, неле гынат, Российысе да вес элласе финн-угор театр-влакым ушаш йöным кычалманак (тений Венгрий ден Эстоний гыч толын кертын огытыл);
— фестиваль кышкарыште драматург-влаклан семинар лийшаш (тышке СТД, Серызе ушем ушнышаш улыт);
— фестивальын шкенжын сайтшым ышташ, тушто калыкле* драматургий материалым вераҥдаш кӱлеш;
— фестивальыш кажне финн-угор республик гыч критик-влакым ӱжаш шотлан толеш;
— курчак театр-влакым фестиваль кышкарыш ушаш, но нуно калыкле йылме дене модшаш улыт.
Тений фестиваль эн сай актер паша-влакым ойырен гын, кок ий гыч лийшашыште тӱҥ верыш режиссуро лектеш. Тыге кутырен келшыме каҥашымаште.
Светлана БЕЛКОВА
А ынде VII «Майатул» фестивальыште сеҥыше-влак дене палдарена:
— Гран-при — «Лемби» спектакль (Карелий Республикын кугыжаныш калыкле театрже);
— Эн сай ӱдырамаш роль — Маргарита Медикова (М.Шкетан лӱмеш Марий калыкле театр, «Эрта ӱмырем, кодеш кумылем» спектакльыште Куван рольжылан);
— Кокымшо планан эн сай ӱдырамаш роль — Светлана Горчакова (Коми Республикысе калыкле музык-драме театр, «Счастье, не исчезай» спектакльыште Вассан рольжылан);
— Кокымшо планан эн сай пöръеҥ роль — Андрей Васильев (Марий самырык театр, «Висвис пушан орлыкем» спектакльыште Милиционерын рольжылан);
— Лӱмын палемдыме приз (Курчак театр-влак коклаште) — Мордовийысе «Крошка» театр да кино центрын «Сияжар» спектакльжылан;
— «Майатул» фестивальын чӱкталтше шӱдыржö» посна приз — Эрвина Гордеева (Марий самырык театр, “Висвис пушан орлыкем» спектакльыште Ольошын рольжылан);
— Эн сай актер-влак ансамбль — Курык марий театрын «Выходили бабки замуж» спектакльыште модмылан (М.Сильвестрова, Е.Васильева, О.Искоскина, С.Зотина, А.Сильвестров).
Сеҥыше-влакым уло кумылын саламлена, нунын дене кугешнена, нунын верч куанена.
Тенийсе фестиваль эн волгыдо шарнымашым кодыш. Тек тудо финн-угор театр коллектив-влакым у пашалан кумылаҥда, усталык корнышто умбакыжат шкем кычалаш тарата.
Тыгак ончо: «Майатул» Марий мландыштак вуча >>
Налмывер: «Марий Эл» газет
Фото-влак «Кугарня» гыч: М.Шкетан лӱмеш Марий калыкле драме ден Карелийысе Кугыжаныш калыкле театр-влакын директорышт Юрий Русанов ден Сергей Пронин. РФ-ын сулло артисткыже Маргарита Медикова. Артист-влак Эрвина Гордеева ден Андрей Васильев. Кугемдашлан темдал.
*калыкле — национальный
MariUver 