Теҥгече М.Шкетан лӱмеш Марий кугыжаныш драме театрыште Финн-угор театр-влакын «Майатул» VII тӱнямбал фестивальышт почылто
Финн-угор тӱням кумдан авалтыше ты фестиваль ынде визымше гана Йошкар-Олаште шке ӱшанле пыжашыжым муо. Унам порын вашлийын моштымынат участник-влакым кажне гана кумылаҥда.
«Майатул» тӱнямбал фестивальыш толшо-влак лӱмеш саламлымашыштым Марий Элын президентше Леонид Маркелов, Россий Федерацийын тӱвыра министрже Александр Авдеев, Россий президентын Юл кундемысе федерал йырвелыште ӱшанеҥже Григорий Рапота колтеныт.
Кугу форумын участникше, унаже-влакым Марий Эл виктер вуйлатышын алмаштышыже, культур, печать да калык-влакын пашашт шотышто министр Михаил Васютин, Россий Кугыжаныш Думын депутатше Лариса Яковлева, Марий Элысе тӱҥ федерал инспектор Илья Акчурин, М.Шкетан лӱмеш Марий кугыжаныш драме театрын директоржо Юрий Русанов саламлышт. Калыкле театр-влакын тӱнямбал театр сымыктыш дене чак кылдалт шогымышт таче кечын раш шижалтеш. Российысе тӱвыра илышыштат тиде фестиваль — кугу событий.
«Майатул» тӱнямбал фестивальым почмашлан М.Шкетан лӱмеш национальный драме театрын сценыштыже шкешотан театр представленийым ямдыленыт. Тудым В.Шекспирын «Кожла кокласе омо» пьесыж почеш келыштарыме. М.Шкетан лӱмеш марий драме театрын артистше-шамыч мастарын модын ончыктеныт.
Фестиваль почмашым Марий Элын калык артисткыже-влак Светлана Сушкина, Зоя Берникова, Иван Палантай лӱмеш тӱвыра да сымыктыш колледжын «Рвезылык» куштышо калык ансамбльже, тиде колледжынак академле музык факультетшын скрипач-влак ансамбльже, «Марий Эл» кугыжаныш куштышо ансамбль да молат сöрастараш полшышт. Финн-угор калык-влакын муро ден куштымашышт дене палыме лийын кертна.
Тиде кечынак фестиваль умбакыже шуйнен. Республикысе курчак театрыште Марий самырык театрын артистше-шамыч Зинаида Долгован пьесыж почеш шындыме «Вис-вис пушан орлыкем» драмым модын ончыктеныт.
Налмывер: «Марий Эл» газет
MariUver 