Марий поэтессым Эстоний вашлийын

Светлана Григорьева

Светлана Григорьевам Марий Элыште веле огыл, ынде йот кундемлаштат сайын палат.

Теве ӱмаште кеҥежым «Моторлык да шучкылык» тема дене писатель-влакын Финляндийыште эртыше тӱнямбал конгрессыштышт участвоватлен. Тушто Америка, Африка, Англий, Франций, Германий, Норвегий, Италий, Польша, Болгарий, Непал гыч сылнымутчо-влак чумыргеныт да вашла палыме лийыныт.

А тений 12-16 июньышто поэтесса Эстонийыште кусарыше-влакын семинарышкышт миен коштын. Туштат француз, голландец, немыч, американ, итальян, болгар, чех, финн, венгр, эстон да молат лийыныт. Мо оҥайже: кок вережат Россий гыч шкетын веле улмаш.

Ӱмаште йот элыш миен кошташ англичан йылмым палымаш полшен гын, тенийже МарКУ-што кок ий тунемме эстон йылмат кӱлеш лийын. Вет лекций-влак йот йылмыла дене эртеныт.

Эстонийыш логалмыж нерген поэтесса тыгерак мане: «Мыйым Эстонийысе сылнымут информаций рӱдер ӱжын. Тушто тыгай семинар ынде ятыр ий эртаралтеш. Тудо писатель-влакым иктеш чумыра да опытым погаш кугун полша».

Светлана Григорьева эстон йылме гыч Эллен Ниитын (тений ты писательница 80 ийым темен) йоча почеламутлажым кусарен да «Гном деке унала» сборникым ямдылен. Тудо ош тӱням 2007 ийыште ужын. Лишыл жапыште вес эстон писатель Эно Раудын, марлаҥдыме – «Регенче Пондаш, Пелботинке да Пуншокш» йомак-повестьше савыкталтшаш. Мо куандара: икымше сборникыштыже сӱретче семын тунемше Р.Мкоян тыршен гын, кокымшыжым Светлана шкеак сӧрастарен. С.Григорьеван кусарыме эстон поэзийжым – Арво Валтонын, Свен Кивисвилдникын, Матхуран – «Кугезе тумо» финн-угор сылнымут ойпого антологийыштат ужаш лиеш. Тудо конгресс вашеш лекшаш.

Семинар годым

Эн ончыч семинарыш толшо 60 еҥ Таллинныш миен пурен. Каласыман: кызыт Таллинн моторештеш. Рӱдыштыжӧ акрет годсо курымышто опталтше кӱ орым кӱнчен луктыт да варажым кава йымалсе тоштерым ыштат.

Ты кастенак Финн залив воктене канаш сылнештарыме Кясмус посёлкысо даче пӧртлаште вераҥденыт. Программыште палемдыме почеш йылме, кусарыме паша нерген лекций деч посна эстон классик Антон-Хансен Таммсааре лӱмеш тоштерыш миеныт.

«Семинар жапыште йот йылмыла дене  ятыр муро йоҥген. Эсогыл меат француз филолог Седрик Фарез дене «Кече лектеш, ончалеш» такмакым йоҥгалтарышна. Куанем: мом эстон писатель-шамыч серат, тудо савыкталтеш,  пуракаҥ ок кий. А кунам ик-кок гана айдемын пашаже ош тӱням ужеш, тунам возышын шулдыржо кушкеш, чоҥештылеш, вара виян лиеш. Кажне авторын ятыр книгаже уло», — чон почын ойла С.Григорьева.

Икманаш, писатель-влаклан йот эл да шуко йылмыш кусарыме эстон автор-влак – Андрус Кивирӓхк, Йӱрген Роосте – дечат тунемаш кугу йӧн лийын. Йот элысе семинарлаш логал кертше поэтессына дене кугешнена да усталыкшым вияҥдаш тыланен кодына. Тыгай вашлиймаш-влак творческий еҥлан нӧлталташыже шулдыр семынак кӱлыт. Тек нуно Светланан да моло марий мастар еҥын шукырак лийыт!

Налмывер: «Кугарня» жаплышташ