2026 ийысе финн-угор тӱнян тӱвыра рӱдолаже кышкарыште Ханкокышто «Finlandia калыкле фонд» финн-угор калык-влакын тӱвыра кылыштлан да икгай вожыштлан пӧлеклалтше репортаж серийым савыкташ тӱҥалын. Тидын нерген тӧнеж шке тӱшкаштыже Facebook мервотышто увертара.
Материал-влак 18 кечаш экспедицийын лектышыж негызеш возалтыт. Тушко фонд Гейдж (финла Тоуко) Керӓненым 2025 ий шыжым колтен. Тудын корныжо Латвий, Эстоний да Финляндий гоч шуйнен. Мӱндыр уна тӱрлӧ калык гыч лекше еҥ-влак дене вияш кылым ышташ тыршен. Нунын коклаште: выру, коми, сету, саам, лив, карел да водь-влак.
Коштмо жапыште финн-угор калык-влак нерген тӱрлӧ тӱвыра материалым да нунын каласкалымыштым погымо. Нунын негызеш тӱрлӧ теме дене 12 статья гыч шогышо цикл лиеш. Историй-влакым чумырымо деч посна, фондын колтымо еҥже америкысе финн-влак нергенат каласкален. Тыге Тоуко США-се диаспор ден Европышто илыше родо-тукымна-влак коклаште опытым ваш-ваш вашталташ негызым пыштен.
Тиде увер кампаний кумда аудиторийым финн-угор тӱнян тӱрлӧ улмыж дене палдарышаш. Тудо 25 миллион наре икгайрак йылман да йӱлан еҥым ушен шога. Мутлан, родына-влак, мемнан семынак мончаш кошташ йӧратат але финн-карел кантеле гай семӱзгарым шоктат, палдара автор.
Статья серий икмыняр лишыл тылзе жапыште лекташ тӱҥалеш. Ӱшанем, те шуко оҥайым пален налыда, шочмо кудыдам шарналтеда да Ханкокышто ий мучко эртыше пайремыш толаш кумылда лектеш, ман воза Тоуко. Циклын икымше статьяже фондын официалле лаштыкыштыже ынде уло. Туштак лудшо-влак шушаш мероприятий-влак нерген рашрак пален налын кертыт.
A FINNO UGRIC WORLD TOUR | Article 1 of 12
Фотолаште:
Екатерина Кузнецова, 2025 Нарваште финн-угор тӱнян тӱвыра рӱдолажын тӱҥ организаторжо да Ингрий Пӧртын директоржо.
Автор Сету чай пӧрт – Seto Tsaimaja ончылно Вярска кугыял, Сетомаа, Эстоний.
Эстон калыкле тоштерыште шуко окса гыч ыштыме сӧрастарышан олыкмарий калык вургем.
Сетомааште верланыше Обиница гыч фото, тодо 2015 ийыште Финн-угор тӱнян тӱвыра рӱдолаже лийын.
2026 ий 24 январь. Тӱвыра рӱдолан символжо, Цирк кайык, 2026 ийысе Финн-угор тӱнян тӱвыра рӱдолажлан США-се Мичиган штатын Ханкок олажлан пуалтеш.
MariUver
мервот – соцсеть,
кугыял – посёлко
MariUver 