Пермь марий-влак фестивальыш коштыныт

Сӱрем тылзын 12-шо кечынже Пермь ола деч тораште огыл верланыше «Хохловка» архитектур да этнографий тоштерыште «Цветьё» калык моторлык фестивальыш верысе марий-влакат куанен миеныт. Вет тушто марий кудым шогалтеныт да уэмдат.

Пермь кундем гыч «Эр ӱжара» ден «Аршаш» марий коллектив-влак шке сылне номерлашт дене куандареныт. Каласыман: ты кудым Суксо район Олык ял гыч конденыт. Тудым тӧрлатеныт да уэмденыт.

Сулий вӱд воктене шындыме пӧртыштӧ кресаньык Иликай Ильин илен. Тудым иктаж 1897 ийыште чоҥымо. Сурт-печыште пырня гыч ыштыме пӧрт, пӧртӧнчыл, амбар да моло оралте улыт. Комдык почмо капка аралалтын огыл, сандене ты верым висен, чертёж дене ыштыме.

А Валентина Панькова марий тӱрлем шотышто мастар-классым эртарен. Тушто чыла кумылан икшыве марий тӱран пазлым поген, закладкым сӱретленыт. Тыгак Зинаида Шевцова шырча дене арверым ышташ кумылаҥден.