Instagram-ыште марий тӱшка

13 000 еҥым ушен шога

Чолга «Марий-влак умылат» Пытартыш жапыште интернет дене пайдаланыше-влак чӱчкыдын Instagram (инстаграм) нерген ойлат. Инстаграмыш телефон гоч пураш йӧнан, тушто чылажат кӱчыкын да раш ончыкталтеш. Кӱлеш гын, кӧ кушто, мом ышта, кузе ила – чыла ужаш лиеш. Лӱмлӧ еҥ- влакын илышыштым эскераш, увер-влакым вашке пален налаш йӧн уло.

Моло мервот семынак инстаграмыште тӱрлӧ тӱшка (группо)-влак улыт. Ты приложений дене пайдаланыше чыла марий-шамыч «Марий-влак умылат – Марийцы поймут» тӱшкам палат, очыни. Таче кечылан ты лаштыкым 13 тӱжем наре еҥ эскера. Шукерте огыл ме тиде тӱшкам вуйлатыше чолга рвезе дене палыме лийна.

Олег Давыдов Татарстан кундем Мамадыш районысо Кугу Шия ялыште шочын. Ачаж ден аваже марий улыт, сандене Олег марий калыкым йӧратыше, пагалыше кушкын. Шочмо йылмыжым сайын пала.

– Индешымше класс деч вара Озаҥысе автотранспортный техникумышто тунемынам. Вара армийыш миен тольым. Умбакыже Озаҥысе кугыжаныш университетыште кӱшыл шинчымашым налынам, транспортный комплексын инженерже лийын лектынам. Но, кузе илышыште шукыж годым лиеш, паша верем специальностем деч ойыртемалтеш. Кызыт мый верблюд межым йӧрымӧ производствышто вуйлатыме пашам шуктем. Икманаш, ремесленник улам, – каласкалыш Олег.

– Инстаграмыште группым почаш тыйым мо таратен?

– Мый интернетысе «Марийцы Казани» группым ыштыше-влак дене кылым кученам, нунылан полшенам. Ты тӱшкалан логотип кӱлеш ыле. Палыме дизайнер деч тудым ыштен пуаш йодым. Кум кече гыч логотип ямде лие. Мутланымына годым палымем инстаграм нерген ойым тарватыш. Кенета тушто марий группым ышташ шонымаш шочо. Вет тиде приложений дене кызыт тынар самырык ӱдыр-рвезе-влак пайдаланат! Вашке мый хештег-влакым ончаш тӱҥальым: #марийцы, #маривлак да тулеч молат. Тыге #марийцыпоймут хэштегым кычал муым. Группым почым, тушан саде палыме дизайнерын ыштыме логотипшым вераҥдышым да тӱшкалан лӱмым пуышым: Марий-влак умылат – Марийцы поймут. Тыге, 2017 ийыште, июньышто, паша шолаш тӱҥале.

– Группын пашажым виктарыме сомыл шуко жапым да вийым йодеш. Тый тиде нелылыкым шижынат мо?

– Тӱҥалтыш жапыште нелырак ыле. Мыланем возалтше (подписчик)-влакым шукырак погаш кӱлын. Тидланже группыш шуко фотом, видеом вераҥдаш, ятыр возкалаш логалын. Эше фотон озаже-влак деч фотом вераҥдаш лиеш але укем йодман ыле. Мо куандара: иктат «ок лий» манын огыл. Кызыт тӱшкаштем 13 тӱжем наре еҥ уло. Возалтше-влак кажне кечын шукемыт.

– Тугеже паша куштылемын?

– Ынде тӱшкаште улшо ӱдыр-рвезе-влак мылам савыктышаш материалым пеш шуко колтат. Чылажым группышко шынденат ом шукто. Ӱмбала-ӱмбала возымаш калыкын шержым темен кертеш манын шонем. Увер лентыште утыждене шуко коят гын, южыжо тӱшка гыч лектынат кертеш. Адакшым шуко возымашым технике могырым ышташ ок лий. Мый чыла тидым шотыш налам, садлан у материалым кечыште 1-2 дене веле луктедем. Шукерте огыл мый у челленджым (модышӱжмашым) ыштенам. Подписчикем-влак машина дене кудалме годым але иктаж вес вере марий мурым мурышаш улыт. Вара тидым видеошко войзыман, тушан @ mariitsy_poimut манын палемдыман. Мый тыгай паша-влакым тӱшкашкем вераҥдем. Ӱдыр-рвезе-влак тиде сомылым уло кумылын шуктат. Ынде самырык-влак марий мурым утларак колышташ, мураш тӱҥалыныт. Тидыже пешак сай. Кызыт группышто уверым ончышо-влакат ешаралтыныт. Мутлан, арняште эн шукыжо 312 тӱжем наре еҥ лаштыкым эскера. Нине цифр-влак мыйым изишак ӧрыктарат.

– Тый марий ӱдыррвезе-влакым ик еш семын чумырет. Тиде моткоч пайдале паша.

– Мыйын тӱҥ шонымашем тыгаяк лийын: марий-влакым пырляшке ушаш. Самырык-влак марий йылмым ынышт мондо, калыкым пагалышт, лудын-возен моштышт. Инстаграмыште эре марла сераш тыршем. Литератур йылме дене чын возаш манын, йылме правилым палыше еҥ деч полышым йодам. Интернет тӱшкам вуйлаташ мылам моткоч келша. Тӱшкаштем улшо-влак деч шуко поро серышым налам: пашамым моктат, южгунам иктаж йодышым рашемдаш полшаш йодыт.

Твиттер, фейсбук, инстаграм, мессенджер, челлендж, хештег, сториз… Тыгай мут-влак шукыштлан йӧршеш йот улыт. Но тачысе илышын йодмыж деч нигуш от шыл. Кугурак-влак кидым лупшал кертыт гын, самырык-влакым виртуалле тӱня деч кораҥдаш тыршыман огыл. Интернетыште вуйым аҥыртылше модыш да осал шонымашан сайт-влак деч посна пайдале, шотан, марий шӱлышан вер-влакат улыт. «Марий-влак умылат» группо – ик сай пример. Тек марий ӱдыр-рвезе-влак кызытсе илыш оргажыште сайжым ужаш тунемыт. Интернет гоч пырля ушнат, икте-весышт дене палыме лийыт, келшен илат, марий улмышт дене кугешнат.

Алёна ЯКОВЛЕВА

Налмывер: «Кугарня» жаплышташ 2018 ий 9 ноябрь.
45 (1507) №