Авалан моктеммур Эстонийыште марла йоҥга

Пайремын ик вӱдышыжӧ С.Акельдина

Теҥгече, 7 мартыште, Тарту марий рушарня школышто Ӱдырамаш кечылан пӧлеклалтше пайремым эртарен колтышт.

Мероприятий шкешотан марий ӱдырамашлан, авалан, моктеммур лийын. Пайремын лӱмжат тидымак пеҥгыдемда «Эн лишыл айдеме улат, аваем!».

Кас мучко ава нерген шуко поро, ныжыл, сылне шомакым вӱдышӧ, йоча да ача-влак ойленыт. Марита Шорникова ава нерген мурым шергылтарен пуэн. Экраныште сылне деч сылне сӱрет вашталтын да залыште мотор марий сем йоҥген.

Рушарня школыш коштшо йоча-влак Александр Юзыкайнын «Изий» йомакшым модын ончыктеныт. Пайремыш погынышо-влак рӱжге «Каласе, авием» мурым муралтеныт, Тошто марий куштымашымат изиш тавалтен налыныт.

Ава-влаклан изи таҥасымаш лийын. Нунылан полдышым урген, ӱпым пунен да галстукым кылден моштымыштым ончыкташ логалын. Каласыман, конкурсышто лийше кум ават тиде кум пашам сайын ыштен моштат. Туге гынат, жюри эн сайлан Люда Матвеевам увертарен.

Пайрем мучаште пӧръеҥ-влак саламлыме почеламут-влакым лудыныт да кажне авалан ик роза пеледыш дене кучыктеныт. «Тарту Марий-влак Ушем» вуйлатыше Васли Николаев организаций лӱм дене пайремыш толшо кажне ӱдыр да ӱдырамашлан ик тюльпан пеледышым кучыктен.

Пайремым рушарня школ туныктышо Таня Албахтина ден Света Акельдина ямдыленыт да вӱденыт. Нунылан ача-ава да йоча-влак полшеныт.

Тарту марий рушарня школ ынде кумышо ий пашам ышта. Кок ий тудо «Тарту Марий-влак Ушем» пелен лийын, тений гыч школым посна лукташ кутырен келшыме. Садлан ӱшанена, ача-ава-влак полшымо дене, туныктышо-влак тений школым образований министерствыште аттестоватлен шуктат, юридически оформитлен кертыт, да школ умбакыжат пашам ышташ тӱҥалеш.

Школлан илен лекташ икымше ий Эстонийысе Родо-тукым программе, кокымшо ий Тарту ола полшеныт. Тений икымше пел ийлан адак эстон программе оксам ойырен.