Киноискусство — олыкмарий вате нерген

«Олыкмарий-влакын кавасе ватышт» кино гыч ужаш2 гыч 9 июньышто Сочиште эртыше XIV «Кинотавр» фестивальыште Алексей Федорченкон «Олыкмарий-влакын кавасе ватышт» кино приз-влак дене палемдалтын.

Картинылан сценарийым возышо писатель Денис Осокин эн сай сценарийлан Григорий Горин лӱмеш призым налын. Кином сниматлыше оператор Шандор Беркеши эн сай оператор семын палемдалтын. А Российысе киновед да критик-влакын гильдийышт Алексей Федорченкон у пашажым диплом дене палемден.

Шарныктем: «Олыкмарий-влакын кавасе ватышт» киношто лӱмлӧ артист Юлия Ауг, Яна Троянова, Яна Сексте, Дарья Екамасова дене пырля марий-влакат: Российын сулло артисткыже Галина Иванова-Ямаева, Марий Элын калык артистше Василий Домрачев, режиссер Алексей Ямаев, Наталья Курочкина, Раисия Илеева, Надежда Смирнова, Сергей Таныгин, Павел Ефимов сниматлалтыныт.

«Кинотаврыште» чылаже 12 картиным онченыт. Жюриште кинокритик Любовь Аркус, композитор Юрий Потеенко, продюсер Сергей Мелькумов, кинокритик Антон Долин, актер-влак Анатолий Белый да Виктория Толстоганова лийыныт. Жюрин пашажым лӱмлӧ режиссер Александр Митта вуйлатен.

Интернетысе сайт-влак «Олыкмарий-влакын кавасе ватышт» кином ончыктымо годым зал гыч пел калыкше лектын кайыме нергенат увертарат. Но тиде чын огыл: калык зал тич лийын. «Марий Декамеронын» авторжо Алексей Федорченкон кумылжо нӧлтшӧ. Йот эллаште ты кином еҥ-влак кугу тӱткыш дене ончат, манеш.

Озаҥ оласе писатель йолташна Денис Осокинат кумылжым кӱшнӧ куча. Эртыше кечылаште тыгайрак серышым серен колтыш: «Марий-влаклан шокшо салам! Кугу кинонаграде-влак мыйын ончычат лийыныт. Но лачак «Олыкмарий-влакын кавасе ватышт» палемдалтшашлык манын, эре ӱшаненам. Ты пашаштына марий теме кумдан йоҥгалтеш. Тиде мыланем моткоч шерге. Мый тидлан поснак чот куаненам. Мый кызыт гына Сочи гыч Москошко чоҥештен толынам. Кумышто Санкт-Петербургыш кудалам. Лишыл жапыште марий лудшо, кином ончышо-влак дене вашлияш йӧн лектеш манын шонем, серен Денис Сергеевич 9 июньышто.

Зоя Глушкова (Дудина)

Налмывер: «Марий Эл» газет

Видео: РЕГИОН 12

6 комментариев

Filed under Артикль-влак, Видео

6 responses to “Киноискусство — олыкмарий вате нерген

  1. Аноним

    Тиде сомыл нерген возымо. Молан эше уэш-пачаш тудымак ту:яш? Шке лу:метым ончыктынет мо? Ала тыят тиде кином моктет? Лудын лек ончыч, кузе аклат палыше-влакше. Вет тыгай су:ретше намыс, маныт. Шкеже онченат мо киножым але ен:ын каласкалымыже почеш ойлет?

  2. Какшан марий

    Зоя, сита мокташ тиде ,, кином,, лукшо йот айдеме влакым. Шкежат эше ужын отыл вет тудым. Ала укшинчаш туналат моло марий вате влак дене пырля. Лучо возо иктаж проблемный статьям. Мо марий калыкын нимогай проблемыже уке мо? Але тугайжым возаш от тошт? А то шерым теменда тиде ,,шедевр,, дене

  3. Никитин С.П.

    Мари вате кино нерген марий газет огеш сере гын — сай огыл. Тиде статьяште Зоя Дудина кинолан акым пуэн огыл, тудо уверым веле каласен, репортер семын. Нимогай удаже ты пашан уке.

  4. Ик марий

    Айдемым чӱҥгаш, вурсаш тӱҥалмыда деч ончыч кеч возымыжым сайын лудын лекса… Никитин чын воза Зоя Михайловна кинолан нимогай акым пуен огыл, лач тудым войзышо-влак Кинотаврыште тудо приз-влак дене палемдалтын ман сера. Адакшым тидын нерген ончыч марла возымо огыл ыле, садлан мо дене Зоя Дудина «уда» шым умыло…

  5. Аноним

    Шукынжо тидын дечын коран:аш то:чат, мондаш тыршат, но тыгай репортер-влак нунылан угыч тиде «ку:кшо:» искусство нерген ушештарат. Чын корно дене каеда!

  6. Аноним

    Театр искусствыштат у да «ку:кшо:» сен:ымаш вуча, маныт. Пуйто А.Петров С.Николаевын «Саликажым» умбаке шуйынеже. Тудын деч ончыч В.Абукаев-Эмгак возен улмаш, сценышкат луктын ыле ала-мо. Курык марий-влакынат тыгай койыш шижалте. Пеш сай традицийыс, йолташ-влак! Ме ынде классикна-шамычын ондак возымыштым шарналтена да кызытсе Писатель Ушемын ЧЛЕНже-влакын ешарен, уэмден шындыме «произведенийыштым» лудын, сценыште ончен да колыштын кертына. Пиалже могай, а!
    Икмыняр йодыш гына тургыжландара: тидым ышташ тыгай «писатель-влаклан» ко: правам пуэн? Нине айдеме-влакын намысышт кушто, этический, морально-нравственный шижмашышт уло мо? «Писатель-классик-влак» радамыш шогалыныт мо? ондак возышо деч сайынрак возаш ту:н:алыныт да садлан «мый ынде чыла кертам!» манын шонат мо? Шоналтыза: «Салика» пьесе калыклан молан келшен, келша да келшаш ту:н:алеш? С.Николаев илымыж годымак молан тудым умбакыже шуен огыл? Вет герой-влакын илышыштышт ала-мыняр вашталтыш лийын кертеш ыле. Но вет автор умбакыже возен огыл… Молан?
    Тидым ынде кызытсе «классикна-влак» ыштынешт. Ну, мо, вучен кодына кокымшо «Саликам», «Кен:еж йу:дым», «Ачийжат-авийжатым», «Каче-влакым» да молымат. Ала нунат сценыш шуко ту:жем гана лекташ да калыкын чонжым куандараш, ойгандараш, сымыстараш ту:н:алыт.
    «Ромео и Джульетта», «Гамлет», «Дон Кихот» да моло произведений-влакын умбаке шуйымо вариантыштым луднеда, ончынеда мо? Тугеже заказым ыштыза Интернетыш… У «классик-влак» тыманмеш лектыт.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s