Мемнан марий тӱвырана шукыжым шочмо калыкнан фольклоржо дене кылдалтын. Но ала-молан ме тудым эре ик семынрак, тыглайрак ужына: стилизоватлыме вургемым чиен, мурен-куштена, руш калык семӱзгар оркестрлан але синтезатор дене эстрадылан семым келыштарена.
Южо еҥ кунамак марий культурышто, литературышто кризис ман воза. Чынжымак, ме эре ик вере тошкештына да фольклорым совет жапысе культпросвет йӱла почеш веле кучылт моштена.
Но калык муро, сем, куштымаш негызешат пеш оҥай, шонаш таратыше постановкым ышташ лиеш. Пример шотеш «KALIMBA» группын руш калык чоншӱлыш (духовный) муро негызеш шындыме «Айдеме кола» («Человек отживает») постановкым ончалаш темлем. Тудо пеш оҥай да тачысе кечылан келшен толшо.
Тошто марий калык мурын, поснак колшым тойымо да шарныме мурын, мутышт пеш келге шонымашан, философий сынан улыт. Тыгай муро-влак, мутлан, урал марий-влак дене аралалт кодыныт. Нине муро мут негызеш да тошто марий, финн-угор семым кучылтын, шкешотан иктаж-могай изи музык да хореографий шындымашым (постановкым) ышташ лиеш.
MariUver
MariUver 
Ышташ лиеш гын ыште. Туныктен ойлышыжо шукын улыт, ыштыже -шагал. Тӱҥалат гын полшышыжат лектыт. Тӱҥалшыжат шаглын улыт.
Мый туныктен ом ойло, шоналташ, тӱвыранам вес семын ончалаш таратыше инфом пуем. Ни фольклор, ни куштымаш-мурымаш але театр алан специалист омыл. Интернетыште увер дене изиш пашам ыштен моштем да икымше, эше 10 ий ончычак, марий-влаклан пӧлеклалтше MariUver порталым 4 йылме дене ыштенам да шкетын кучен шогем.
Тыланет, тидлан пеш кугу тау! Тыштыже ыштен моштышыжо кодынат огытыл дыр ынде, уло калыкна шочмо мланде гыч каен пытен ала мо.