Кок тылзе наре жап Йошкар-Олаште «Усталык памаш» калык творчество фестиваль залыш шуко калыкым погыш. Республика гыч кум тӱжем наре коллектив, сценыш лектын, шке мастарлыкше дене палдарыш. Нуно моткоч тӱрлӧ лийыныт, ойыртемалтыныт район-влак тичмаш налмаштат. А кодшо шуматкечын фестиваль иктешлалте. Эн ойыртемалтшыже-влак лауреат лӱм да пӧлек дене палемдалтыныт.
Фестиваль, ик могырым, верлаште художественный самодеятельность могай кӱкшытыштӧ улмым рашемдаш полша. Вес могырым, тудо коллектив вуйлатыше-влакым утларак чолган пашам ышташ кумылаҥда – вет тиде нунылан шкешотан экзамен. Мо куандара, тачысе куштылго огыл жапыштат йоча-влак калык муро-куштымашлан мелын улыт. Мутат уке, самырык тукымым коллективышке ушнаш савырен мошташ кӱлеш. Ӱдыр-рвезе-влак тӱҥ шотышто куштымаш дене волгалтыч. А Йошкар-Олаште вокальный йоча ансамблят шагал огыл.
Сеҥыше-влакым кугыеҥ-влак да йоча-влак коклаште ойырен палемдыме. Палемдалтыныт шкет мурышо да вокальный ансамбль, хор, мурышо да куштышо, куштышо ансамбль, изирак инструментальный, инструментальный ансамбль-влак. Лауреат-влак дене пырля посна номинацийыште сеҥыше-влакым ойырымо: калык усталыклан ӱшанле улмылан, калык куштымашым калыкыш лукмылан. А йоча коллектив-влак кокла гыч шукынжо кушшо тукымым калык куштымаш усталыкым вияҥдымашке ушымылан палемдалтыныт.
Районын программыже тудым шындыше режиссерын мастарлыкше денат чак кылдалтын. Вет посна номер-влакым ик тӱшкашке кузе чумырен моштет, туге ончалтеш тичмаш налмаште концерт. Нунын коклаште лауреат дене пырля творчески кычалше номинаций лийын.
Сеҥыше-влак радам пеш кугу, кажныжым посна палемдаш йӧнна уке. А теве ончышо-влакын кумылыштым утларак савырыше-влакым палемден кодена. Теве нуно кӧ улыт:
Марина Садова – Оршанка район;
«Савак кундем» калык фольклор ансамбль – Марий Турек район;
Йоча искусство школын куштышо коллективше – У Торъял район.
Гала-концертын программыже эн сай мурызо ден куштышо-влакым иктеш чумырен. Тудым Морко поселкысо В.Лазарев лӱмеш хор почо да тиде районынак «Рвезылык» куштышо ансамбльын Морко сӱан куштымашыже мучашлыш. Ик тидак районысо коллектив-влакын мастарлыкышт тичмаш налмаште кугу кӱкшытыштӧ манмым ончыкта. Районын концертше деч вара тидымак палемден коденна ыле. Сценыште марий муро-куштымашым руш программа алмаштен. Йоҥгалтын сылнын татар муро. Кажныжымат ончышо моткоч шокшын вашлийын. Тидыже самодеятельность калыклан лишыл манмым пеҥгыдемда. Гала-концертымат тиде кечынак кокымшо гана ончыктымо – тунар шуко лийын билетым йодын толшо.
Палемдыман, фестиваль жапыште тыгак кидмастар-влакын паша выставкышт ончыкталтын. Могай гына шке ыштыме арверым конден огытыл тушко районла гыч. Арам огыл ойлат: мастарын кидешыже тоят пеледеш.
Светлана Белкова
М.Скобелевын фотожо
Налмывер: Марий Эл
MariUver 