Икымше гана тудо 2009 ийыште Морко районысо Октябрьский посёлкышто эртен, кокымшо слётым Советский районысо Ушнур школ вашлийын. А кызыт Российысе марий самырык тукымын кумшо слётшо Курык марий районысо Эмансолаште эрта. Кундемнан кажне районжо да марий-влакын тӱшкан илыме Пошкырт, Одо, Татарстан республикыла, Виче, Угарман, Свердлов область, Моско да Санкт-Петербург гыч 120 удыр-рвезе погынен.
Нуным слёт почмо дене саламлаш шуко уна толын. Тиде Россий Федераций Думын депутатше, Мер каҥашын председательже Лариса Яковлева, Марий Эл Правительстве вуйлатышын алмаштышыже, тӱвыра, печать да национальность паша шотышто министр Михаил Васютин, Туныктыш да шанче министрын алмаштышыже Надежда Ефремова, самырык тукым политике шотышто управленийын начальникше Пётр Журавлев, «Йошкар-Ола» ола округ депутат-влак погын председатель Леонид Гаранин, Курык марий район администрацийым вуйлатыше Леонид Кубеков да молат.
Слётын программыже шкешотан. Тӱҥ шотышто икымше ден кокымшо слётышто нуным утларакшым марий калыкын йӱлаже, тӱвыраже, эртыме корныжо дене палдареныт гын, тений тунеммашлан кугу верым ойырымо, оҥай лекций-влак эртат: кузе шке пашам тӱҥалаш да тудым виктарен шогаш, могай йӧным кучылташ, кузе калык ончылно шкем кучаш. Семинар-влакым «Самырык предприниматель-влак» проектын вуйлатышыже Михаил Сабанин, мер пашаеҥ Валерий Мочаев, журналист Алёна Иванова вӱдат.
Таклан огыл слётым эртараш Курык марий районым ойырымо. Кумда Юл серын пурла могырыштыжо пӱртусшат ойыртемалтше, тӱвыражат, йӱлам шуктымо радамжат, йылмыжат весе. Чыла тидын нерген мыланна икымше кечын оҥай лекций лийын. Кокымшо кечын ӱдыр-рвезе-влак тиде ойыртемым шке шинчаштенак ужыныт, эскереныт. Фермер озанлыкыште лийыныт.
Слёт кайыме жапыштак кидмастар кружок-влак пашам ыштат, спорт модмаш, конкурс-влак эртат. Марий еш йӱла нерген каласкалыше лекций эртен.
Слётын ик эн тӱҥ шонымашыже — марий самырык тукым коклаште лидер-влакым кушташ.
Ме марий-влак тӱрлӧ кундемлаште илена, тӱрлӧ пашам шуктен шогена, эсогыл йылмынат изиш ойыртемалтеш. Но ме ик калыкын шочшышт улына. Ик ой да ик шонымаш дене илена, пашанам вораҥдарен колтена. Тыгодым арален кодена да тукым гыч тукымыш шуэна тӱвыра поянлыкнам, ойыртемалтше йӱланам.
Кажне самырык еҥ слёт деч мом гынат уым, ойыртемалтшым вуча.
Алёна Иванова
MariUver 