«Марий Эл радио» «Изи чотан калык-влакын йылмышт компьютер технологийыште: опыт, задача да ончыкылык» лӱман конференцийым эртараш палемден. Тудо Йошкар-Олаште 25-27 апрельыште лиеш.
Тиде конференций Европын Каҥашыже, Европа Ушем да Российын Региональный вияҥмаш министерствыжын «Российыште изи чотан калык-влак: йылмым вияҥдымаш, культура да граждан общество» грантышт кӱшеш эрта.
Конференцийым Марий Элын Культура, печать да национальность-влак паша шотышто министерствыже, В.М.Васильев лӱмеш Йылмым, литературым да историйым шанчын-шымлыше Марий институт, Марий кугыжаныш университетын Финноугроведений институтшо эртараш плшат.
Кум кече жапыште конференцийын участникше-влак компьютер технологийыште изи чотан калык-влакым йылмыштым кучылтмо шоышто Российысе да вес элласе опыт, изи чотан калык-влакын йылмыштым вияҥдымаште компьютер йӧным кучылтмо опыт, тӱрлӧ йылмым вияҥдымаште нине опытым кучылтмо шотышто йӧн да ончыкылык дене кылдалтше йодыш-влакым каҥашат.
А Марий Эл радион пашаеҥже-влак тачысе кече марте илышыш пуртымо поектышт дене палымым ыштат, ввв.марламутер.ру негызеш финн-угор йылме проект-шамычым: мутерым, компьютер терминым шочмо йылмыш кусарыме шотышто – шуктымо ончыкылыкым каҥашаш темлат.
Конференцийым иктешлыме амал дене тиде форумышто йоҥгалтше материал-влак сборникым савыктен лукташ палемдалтеш. Сандене тиде мероприятийым ямдылыше-влак доклад, статья, проект шонымаш-влак текстым ончылгоч колташ йодыт.
Конференцийыште пашам ышташ кумылан-влак 1 апрель марте йодмашым conferece@marlamuter.ru электрон адрес дене колтышаш улыт.
Вэ ЭС
MariUver 