Урал да Сибирь марий-влак У ий пайремым марла эртарат

Свердловск областьысе Первоуральск олаште У ийым марла пайремлаш тӱҥалыт.

Йӱштӧ Кугыза ден Лумӱдыр тендам 18 декабрьыште 18.00 шагатлан «Мельница» кафеште вучат. Сергей Байназов да «Канде кава» марий эстраде да фольклор группо пайрем кумылым нӧлташ полшат. Тиде кастеным палыме лияш, марий мурым мураш, кушташ лиеш…

Каласыман, тыгай погынымаш Первоуральск олаште икымше гана лиеш. Кызытсе жаплан пайремыш Пошкырт кундем, Марий Эл да Югра гыч марий-влак толаш сӧреныт.

«Марий сем иктымат кумыл деч посна огеш кодо. Пагален ӱжына!» — возат первоуральск оласе марий-влак mari-el.name сайтыште.

Пайрем нерген тыгай телефон-влак дене рашемдаш лиеш:
+7-3439-648344, 668384

MariUver