Тыгай ийготыш шумеке, кажне йоча шкенжым кугу улам манын каласен кертеш, но але йол ӱмбак шогалын огыл, молан манаш гын эше тунемеш, вияҥеш, ушым пога. Тугеже МАФУН-ланат эше тунемаш да тунемаш, кушкаш да кушкаш. Тидын нерген МАФУН-ын ончычсо президентше Яак Проозесат саламлыме телеграммыштыже каласен.
Ты шочмо кечым кузе пайремлыме нерген организатор-влак вуйым шуко пудыратеныт. Ала кугу концертым ышташ, ала иктаж-могай вес мероприятийым эртараш… Тыге, пырля погынен, ассоциацийын эртыме корныжым шергалаш пунчалыныт.
Мер-политик рӱдерын лудмо залыштыже ассоциацийын кызытсе самырыктукымжо дене пырля МАФУН-ын икымше президентше Александр Абдулов, тудын пашажым шуйышо Светлана Смирнова, шке жапыштыже МАФУН-ын ик эн чолга еҥже-влак Л.Клещина (Шипицына), Андрес Хейнапуу лийыныт. Нунат самырык пагытыштым шарналтышт, родо-тукым кылым утларак вияҥдыме нерген ойлышт.
МАФУН-ым лӱмгечыж дене саламлаш Россий Кугыжаныш Думын депутатше, Мер Каҥашын вуйлатышыже Людмила Яковлева, тÿвыра, ойсавыш да калык-влакын пашашт шотышто министр Михаил Васютин толыныт.
МАФУН-ын историйже дене РФ АФУН-ын шуктышо комитетше пелен шанче-эксперт каҥашын йыжеҥже Татьяна Юзыкайн палдарен. Тудын каласкалымыж деч вара мутым А.Абдулов нале:
— Пагыт ятыр эртен, шукыжым ынде мондашат тӱҥалме. Тау, те мыйым самырык пагытышкем пöртылтышда. 80-шо ийлаште кеч-могай пашамат тӱҥалаш неле лийын. Совет жапыште чылажым ойлаш лийын огыл, но самырык вийна, шолын шогышо вӱрна чарак-влакым сеҥен, ончыко вӱден, — манын тудо.
М.Скобелевын фотожо
Налмывер: «Марий Эл» жаплышташ
MariUver 