М.Шкетан лӱмеш калыкле* драме театр — марий калыкын сымыктышыжым* чапландарыше рӱдö вер. Тений тудлан 90 ий темеш. Артист-влак у тургымыштым тиде лӱмгече денак кылдат. Кызыт тушто репетиций эрта.
— 90 ияш лӱмгечым сай кӱкшытыштак палемден, эртарен колтынена, — ойла М.Шкетан лӱмеш театрын тӱҥ режиссёржо, Марий Элын сулло артистше Роман Алексеев. — Сентябрьыште Москош гастрольыш каена. Вячеслав Спесивцевын театрыштыже «Блин-2» спектакльым модын ончыктена. Туштак марий концертым ончыкташ палемдыме. Мыланна Москосо «Марий Эл землячество» кугу полышым пуа. Тургым жапыште мемнан деке Спесивцевын театржат гастроль дене толшаш.
90 ияш лӱмгечылан «Шкетан деч — таче кече марте…» марий драматургий фестивальым эртараш палемдыме. Эн ончычак М.Шкетанын «Ачийжат-авийжат» драмыжым модын ончыктат. Тиде спектакль денак 16 октябрьыште у тургым почылтеш. Сергей Чавайнын «Мӱкш отар» драмыже зрительым кумылаҥда. Сергей Николаевын «Салика», Николай Арбанын «Кеҥеж йӱд» комедийышт шукертак марий сымыктышын шöртньö погышкыжо савырненыт. Нуным угыч ончен кертына. Арсий Волковын «Каче-влак», Вячеслав Абукаев-Эмгакын «Алиса, Анфиса, Аниса» комедийышт, Зинаида Долгован «Пысман корем» трагикомедийже, Юрий Соловьёвын «Йыван Кырла» драмыже модын ончыкталтыт.
А ноябрьыште лӱмгече кас лиеш. Тушко театрын ветеранже-влакым, финн-угор кундемла, пошкудо республикыла гыч режиссёр, артист-шамычым пагален ӱжыт. Лӱмгечылан Медведево районысо Сенькан ялыште (а икымше спектакльым 1919 ийыште театрын артистше-влак икымше гана тушто модын ончыктеныт) шарнымаш оҥам вераҥдаш лийме.
У тургымышто «Кай, кай Йыванлан» спектакль угыч сценыш пöртылеш. Тудым режиссёр Алексей Ямаев шында. Моло у пашат вуча.
Юрий Григорьев
Снимкыште: «Ачийжат-авийжат» драма гыч ужаш
Д.Речкинын фотожо
Налмывер: «Марий Эл» жаплышташ
* калыкле — национальный, сымыктыш — искусство
MariUver 