Морко сымыктыш школын «Калинка» ансамбльжылан ӱмаште ноябрьыште Египетысе Шарман-эль-Шейх олаште эртыше Руш творчестве фестиваль гыч сеҥымаш дене пӧртылмыж деч вара мастарлыкым тергаш ятыр вер гыч ӱжмаш толын. Шукерте огыл тудо тӱнямбалсе «Преображение» конкурс-фестивальыште Санкт-Петербургышто марий куштымашым ончыктен да икымше верым конден. Такшым «Калинка» ансамбль (вуйлатышыже С.А.Ефремова) тӱнямбал кӱкшытыштӧ ныл гана участвоватлен, кум ганаже лауреат лӱмым налын, а ик ганаже икымше степенян дипломан лийын.
Тӱнямбалсе фестиваль Санкт-Петербургышто 6-12 июльышто эртен. Тудым поро кумылан Беневал фонд эртарен. Цирк гыч тӱҥалын, вокал, тӱрлӧ семӱзгар дене шоктымо шотыштат таҥасымаш-влак лийыныт. Тышке Российын тӱрлӧ олаж, тыгак Узбекистан, Белоруссий, Нидерланды элла гыч ушненыт. Марий Эл гыч 22 йоча да кум кугыеҥ миен коштын. Конкурсышто шке вийжым «Калинка» куштышо ансамбль дене пырля Морко тӱвыра полатын «Музыкальная шкатулка» мурышо ансамбльжат (вуйлатышыже Е.Н.Григорьева) терген.
Кугырак (14-15 ияш) ӱдыр-рвезе-влак Провой вел ден тошто марий куштымаш-влакым, а изиракышт (10-12 ияш-влак) «Ой, луй модешым» да Элнет велын йыр савырнен куштымашыжым ончыктеныт. Кок тӱшкажат икымше вер дене палемдалтын, кубок да диплом дене пӧртылын.
«Музыкальная шкатулка» ансамбль «Хочу влюбиться» ден «Подари улыбку миру» мурыла дене кокымшо верыш лектын. А Даша Лапшина солистка семын мурымыж дене ойыртемалтын: кумшо верым налын.
«Йоча-влак моткоч куаненыт, — каласкала сымыктыш школын хореографше Светлана Анатольевна. — Ме Санкт-Петербургысо кугыжаныш университетын Студгородокыштыжо иленна. Тиде вузынак концерт залыштыже конкурс эртен. Тылеч посна Петродворецыш экскурсий дене кок гана миенна, Петр I кугыжан резиденцийжым онченна. Тыгак организатор-влак Санкт-Петербург ола мучко коштыктеныт, историй дене кылдалтше верлам ончыктеныт. А вара ӱдыр-рвезе-влак дене пырля эҥер ден каналла мучко экскурсийыш шкегыч миенна».
Тылеч посна вич регион кокла гыч «Калинка» ансамбльлан «Национальный тӱвырам аралымылан» ЮНЕСКО-н дипломжым кучыктеныт. Ты диплом йот эллаштат мастарлыкым ончыкташ йӧным пуа.
Эльвира Ендылетова
Налмывер: «Кугарня» газет
MariUver 