Мер Каҥаш «Единый Россий» денe келшынеже

Кодшо арнян «Ик Россий»* пӱтынь российысе партийын Москошто эртыше Х погыныштыжо мемнан республик гыч латкок еҥ лийын. Кузерак миен толмо нерген Йошкар-Оласе Мер-политик рӱдерыште погынын делегатше-влак: «Ик Россий» партийын Марий кундемысе пӧлкажын секретарьже Владимир Мухин, Кугыжаныш Думын депутатше Лариса Яковлева, кундемысе политкаҥашын* еҥже-влак, Марий Эл президентын администраций вуйлатышыжын икымше алмаштышыже Станислав Швецов да Кугыжаныш Погынын мланде комитет гыч депутатше Галина Богданова — иктешлен каласкаленыт.

Эн ончыч съездын тӱҥ шонымашыже, ойыртемже шотышто мутым тарватыме, Россий президент Дмитрий Медведев ден виктер вуйлатыше Владимир Путинын, партийын Кӱшыл каҥаш председательже Борис Грызловын ойлымыштым умылтарен пуэныт.

Погын тӱнян экономике поргемыш логалме жапыште эртен гынат, элым вуйлатыше-влак, нимыняр чакныде, ончыко ӱшанлын ончат да Российым утларак вияҥдаш гына тарваненыт. Тидыже шагал огыл раш задача-влакым палемдыма гыч коеш. Икмыняржым илышыш шыҥдарашат тӱҥалме, депутат-влак келшыше законым ямдылен шогат. Эртыше погын тыгак оптимизаций шӱлышан улмыж дене ойыртемалтын.

Элна тӱнямбал кризисым куштылгын сеҥаш, илышым эшеат саемдаш чылажымат ышташ тӱҥалеш. Тидым «Ик Россий» партийын гына огыл, а чыла еҥ умылышаш да илышым саемдаш кажныже эшеат утларак тыршышаш манын палемденыт.

Пресс-конференций деч вара «Ик Россий» партийын кумдаҥдыме каҥашпогынжо* эртен. Тудым почмо годым В.Мухин партийлан 1 декабрьыште шым ий темме нерген ойлен да погынышо-влакым ты пайрем дене саламлен.

А тылеч ончыч «Ик Россий» партий МРО-н секретарьже В.Мухин ден Марий Мер Каҥаш председатель Л.Яковлева, пырля пашам ышташ пунчалын, ойпидышеш кидпалым пыштеныт. «Демократий шӱлышан элыште ушем-влак коклаште келшымаш озалана гын веле кундемыштына илышат саем кертеш. Сандене ме тыланда полшаш тӱҥалына», — ӱшандарен Владимир Иванович. А Лариса Николаевна тидлан тауштен да пырляште вий улмо нерген, иктеш чумырген гына чыла нелылыкым сеҥаш куштылго манын ойлен.

Эдуард Иманаев

Налмывер: «Марий Эл» жаплышташ

*Ик Россий — Единый Россий, кундемысе политкаҥаш — региональный политсовет, каҥашпогын — заседаний