8–15 сентябрьыште Китай Калык Республикысе Циньхуандао олаште «Шӧртнӧ кумдык» («Золотая площадь») тӱрлӧ калыкын тӱвыражым ончыктышо тӱнямбал фестиваль эртен. Тушко Марий Эл гыч кум коллектив миен, увертара «Кугарня» газет.
Тиде Йошкар-Оласе Бауман лицей пеленысе «Лира» йоча сымыктыш школын «Узоры» мурышо да куштышо йоча тевыкле ансамбльже, Марий Турек районысо Карлыган тӱвыра пӧрт пеленысе «Зардон» одо калык фольклор да Медведево районысо Арбан сымыктыш школ пеленысе «Фантазия» ансамбль-влак.
Лицей гыч 50 наре еҥ каен: ансамбльым вуйлатыше, тусо туныктышо-шамыч, йоча-влак, ача-ава. Марий Элысе кидпаш сымыктыш ончерым наҥгаеныт. Тушко миен толаш оксам шкаланышт тӱлаш логалын.
Марий Турек районысо Карлыган тӱвыра пӧрт пеленысе «Зардон» ансамбль гыч 32 еҥ Китайыш миен коштын. Нунылан корныш лекташ шийвундо дене верысе район администраций полшен. Тыгак верысе калык оксам поген пуэн, тек одо калык культурым Китайыштат ужышт манын шонен. Тиде шийвундо поезд дене Москош кудалаш ситен. А самолёт дене чоҥешташ шкаланышт оксам луктын пыташышт пернен.
Ондак поезд дене Москошко кудалыныт, вара тушеч самолёт дене Пекиныш 8 шагат наре чоҥештеныт, тушеч автобус дене Циньхуандао олашке каеныт.
Чылаштымат моткоч оҥай программе вучен. Тиде фестивальым почмаш, этнокас-влак, тӱрлӧ номинацийыште конкурс программе-шамыч, Российын регионлаж гыч кондымо кидпаша сымыктыш выставке-влак, мастар-класс, «йыргешке ӱстел» да молат.
Кок курык коклаште 200 метр кӱкшытыштӧ верланыше янда гыч ыштыме кужу кӱварыште тӱрлӧ калык шке костюмжым ончыктен, дефиле лийын. Марий-влакат тушко ушненыт.
Тушто кажне калык шке этнокасым эртарен. Марий касыште Марий Эл гыч мийыше коллектив-влак, олыкмарла, эрвелмарла, курыкмарла, рушла да одыла кушташ туныктеныт. Йыр шогалын тывырдыкым тунемыныт.
Александр Речкиным фестивальын оргкомитетше Россий Федераций лӱм дене ты мероприятийым почмаште да гала-концертыште вӱдышӧ лияш ойырен. Александр тыгак фестивальын мучашлыше мурыжым мурымо годым солист лийын, воза «Кугарня» газет.
MariUver
Фотосӱрет-влакым «КонтактЫште» мервот гыч налме
тевыкле – образцовый
MariUver 
Если бы в Китай поехал театр балета министра культуры Константина Иванова, то деньги нашлись на все. Но на марийскую культуру у этого обрусевшего чуваша всегда нет. Вся марийская культура в Марий Эл держится и существует за счет самих марийцев!