Эн чолга, эн ушан, эн мотор, эн тале, эн писе да пӱсӧ, икманаш, эн,эн,эн лач ме улына, вет кажныже марий калыкын икоян ешышкыже пурена! Нине мут Россий кӱкшытан Марий самырык тукым II слётышко чумыргышо 120 ӱдыр-рвезын шӱм-кылешышт лакемын кодын манын, ӱшаныме шуэш.
«Ме марий улына!» тӱшкан, ик йӱк дене рашкалтарымеке, шинчавӱд толеш», — чонжым почо Татарстан кундемысе чолга рвезе Владилен Третьяков. Тиде ойын рӱж йоҥгалтмыже эше ятыр пагыт пылышлан солнаш тӱҥалеш, а тушто вашлийме йолташ-влакым омеш ужмо дене гына огына серлаге – илыш корнышто икте-весыланна эҥерташ шонена. Тыгай кумыл дене Моско, Виче, Одо вел, Пермь, Пошкырт, Санкт-Петербург, Свердловск, Татарстан, Угарман, Украина, Эстоний, Югра гыч уна-влак У Роҥго районысо Ӱшнур школ гыч илыме верлашкышт шаланышт, ты шӱлышак Марий кундемеш кодо.
Чеверын, Марий самырык тукымын II слётшо… Салам, III слёт!!! Тиде кугу мероприятийым кокымшо гана эртарымаш да тудым умбакыжат шуяш шонымаш моткоч сай. Кодшо ийысе «икымше мелнам» (тудо йӧршынат когарген огыл) тамжым налын, таче организатор-влак у кӱкшытым налыныт. Программым ончалаш гын, чыла кӱлешаным тыште авалтыме, слёт кышкарысе кажне тат патриотизм кумыл дене варналтын, марий шӱлыш дене пойдаралтын. Эрдене эрак кечыйол дене пырля йымыжа шаршудышто чарайолын физзарядкым ыштымаш тӱрыс кечылан вийым ешарен. Тыге тыландат ышташ темлена – эн кугу пӧлек волгыдо шижмаш да кап-кыл куштылгылык лийыт.
Жап писын эрта. Тидым чыланат шижыт. Ме таче самырык улына, но южынан икшывынат кушкыт. Да кажныже ончыкшым ача але ава лийшаш. Сандене кызыт шоналташ кӱлеш: мом меже вес нӧргӧ тукымлан пуэн кертына? Теве мыйынат эргым уло. Ончыкшым тиде слётышто тудат лийшаш, садлан таче мыят тушко ушненам.
II слётын темыже: «Туныкташ туныктена». Тудо Туныктышо идалык дене кылдалтын. Тыге тышке школышто, йоча-влак дене пашам виктарыше моло тӧнежыштат тыршыше, мер пашаеҥ, студент-влак толыныт. Теве тӱрлӧ кидмастар сомыллан тунемынна. Мыланем Виталий Кудрявцевын арама воштыр гыч финн талингам пидыктымыже келшен. Санкт-Петербург гыч самырык шымлызе Елена Таникова ия-ковыж дене шокташ туныктен. Республикысе самырыктукым дене пашам виктарыме шотышто виктемын вуйлатышыже Пётр Журавлёв калыкле кучедалмаш нерген ойлен, рвезе-влаклан шкеныштым тергаш йӧным пуэн. Йошкар-Оласе Политехник интернат-лицейым вуйлатышын шанче шотышто алмаштышыже Наталья Давыдован проект паша ойыртем нерген каласкалымыже ушеш кодын. Тудын ой-каҥашыж дене ончыкшым пайдаланаш тӱҥалына. Тыгодымак кажне регион шке проектше дене палдарен.
Профессор-влак Иван Иванов да Галина Шкалина дене вашлиймаш-влакынат кышашт волгыдо лийшаш. Галина Евгеньевна марий калыкын эртыме корныжым шергалгалаш таратен гын, Иван Григорьеьвич дене у мут-влакым йылмышкына шыҥдарыме шотышто мутланымаш эртен.
Мероприятий-влак тыгак Марий кундемын 90 ияш да Сеҥымашын 65 ияш лӱмгечыштлан пӧлеклалтыныт. Йошкар-Олаште Пеледыш пайремыште, Агавайремыште, У Роҥго районысо Роҥго, Вечын, Кельмаксола, Шуарсола школлаште, Шнаран селасе имне спорт базыште лиймаш, Марий самырык театрын «Ава шӱм» спектакльжым ончымаш, тиддеч вара шӱм-чон почын мутланымаш, танцполышто да паша коклаштак мурен-куштымаш да шуко-шуко моло вашлиймаш ден тергымаш ик ийланак вий-куатым пуэныт.
«Марий тӱвырам вес культурыш шындараш тӱналына, вет Марий Эл деч тораште илена гынат, марий улмына нерген огына мондо», — пеҥгыдын каласыш слёт годым таче Москошто илыше марий мурызо Вероника Сергеева (Кондратьева). «Марий улмына деч вожылмым чарненна», — ешарышт Одо вел ӱдыр-влак. Куд кечыште (18-23 июнь) тӱрлӧ кундем гыч толшо-влак икте-весыштлан лишыл еҥыш, родыш савырнен шуктеныт.
II слёт мучашлалтын, республикысе тӱвыра, печать да калык-влакын пашашт шотышто министрын алмаштышыже Владимир Актанаевын манмыжла, ынде, илен-толын, кугешнен шарналташ кодеш: «Мыят лийынам II слётышто!» А самырык тукымын пашаже тӱҥалеш веле. Тыште налме вий-куатым кӱлеш семын кучылтман, марий шӱлышым эшеат кумданрак шарен колтыман да кӧ улмына нерген эреак шарныман. Шыжым – калыкшотлымаш. Тунам ме могай калык гыч улмо корныш марий улмына нерген кугешнен серышаш улына. А вес тыгай слётышто Марий Элысе туныктеж министр Галина Швецова ден «Нью-Трейд» фирмым вуйлатыше Андрей Герасимов марла мутланаш тӱҥалыт манын ӱшанена, вет нуно самырык-влак ончылно тидым товатлышт.
Кугу таум каласыме шуэш РФ Кугыжаныш Думын депутатше, Мер Каҥашым вуйлатыше Лариса Яковлевалан, Мер Каҥашын енже Валерий Мочаевлан, «Марий Эл радион» пашаеҥже Наталья Пушкиналан, Ӱшнур школ директор Валерий Галкинлан, тусо пашаеҥ-влаклан, У Роҥго районысо вуйлатыше-шамычлан, икманаш, тиде слётышко шке надыржым пыштыше кажне еҥлан. Посна, посна улына ме чӱчалтыш, пырля – теҥыз.
Российын ончыкылыкшо – самырык тукымын кидыштыже. Тиде ойым ик гана веле огыл колынна. Чынже денак кеч-могай калыкынат эрласе ӱшанле кечыже кушкын толшо ӱдыр-рвезе-влак деч шога: мом ме ача-авана деч налынна, мом нуно пуэныт, кузе тудым илышыш шыҥдарен кертына, могай мемнан шонымашна, палена мо тукымвожнам, аклен моштена мо йылмынам, кугезе коча-кованан йӱлажым палена да умбакыже шуена, тӱвыра кӱкшытна могайрак, шочмо калыкнан да ик эн лишыл кундемнан историйыштым шарнена?.. Тыгай йодыш нимучашдыме шуко да вашмутшат ятыр, тӱрлӧ сынан, акан. Но ме таче палена: марий улына, марла ойлена, марий лӱмна дене кугешнена, тӱрлӧ кундемыш шаланен пытенна гынат, ик еш семын илена! Тек эре тыге лиеш!
«Марий Эл ТВ»-н видеосюжетше:
«РЕН ТВ — 12 регион»-ын видеосюжетше:
Эльвира Куклина
И.Речкинын да авторын фотошт
Налмывер: «Кугарня» газет
MariUver 
Шӓлӓ!
Мыры пӹрня тӓлӓндӓ, мары сӓмӹрӹквлӓ!