Йошкар-Ола финн-угор писатель-влакым вашлиеш

МарГУ встречает П.Домокоша

В.Макаров П.Домокошым вашлиеш

Таче Марий Элнан рӱдö олаштыже, М.Шкетан лӱмеш кугыжаныш театрыште, Финн-угор серызе-влакын Х тӱнямбал конгрессышт почылтеш.Тиде кугу форум шочмо калыкнан илышыштыже лӱмгечан кугу пайрем семын увертаралтын.

А ончыгече Москва-Йошкар-Ола поезд мӱндыр уна-влакым кондыш. Финляндийын, Венгрийын, Эстонийын ӱдыр-эргышт кугезе тукымын тӱп мландышкыже тошкальыч.

Чылаже витле наре унам тошто палымыла вашлийыч Марий Эл тӱвыра, печать да национальность паша шотышто министрын алмаштышыже Галина Ширяева, Марий Эл Кугыжаныш Погынын депутатше, Марий кугыжаныш университетын ректоржо Виталий Макаров да молат. Арво Валтон, Петер Домокош, Янош Пустаи, Кари Салламаа, Ева Тулуз, иза-шольо калык-влак деч шокшо саламым конден, мемнан кинде-шинчалнам тамлышт.

Родо-тукым писатель-влак икымше гана 1989 ийыште Йошкар-Олаште вашлийыныт. Тунам Марий Эл Сылнымутчо ушем вуйлатыше Миклай Рыбаковын кумылжо да тыршымыж дене шочын тыгай йӱла: кажне кок ий гыч, пырля чумырген, ваш-ваш шинчаш ончалын, илышын темлыме пӱсö йодыш-влакым пырля каҥашаш.

Тылеч вара шочмо йылмым тӱзатыше серызына-влак Финляндийыште, Венгрийыште, Эстонийыште, Сыктывкарыште, Саранскыште, Ханты-Мансийскыште, Карелийыште — родына-влакын илыме чыла гаяк кундемыштыже — вашлийыныт. Кажне гана, келге шонымашке возын, пагытын темлыме азапшым лончыленыт.

Луымшо вашлиймаш, латиндеш ий жапыште ыштыме пашам иктешлен, самырык авторым куштен шогымо йодышым ончаш тӱҥалеш. Марий Эл Республика деч ты конгрессыште делегат семын Василий Крылов, Альбертина Иванова, Анатолий Тимиркаев, Виталий Петухов, Альберт Васильев, Зоя Дудина, Татьяна Очеева, Светлана Архипова, Татьяна Соловьева пашам ышташ тӱҥалыт.

А.Валтон, �.Тулуз, Е.Айпин

А.Валтон, Э.Тулуз, Е.Айпин

Теҥгечак Финн-угор сылнымут ассоциацийын тӱнямбал вуйвержын заседанийже лийын. Вуйверын еҥже-влак конгрессыште ыштышаш паша радамым рашемденыт, резолюциеш палемдышаш йодыш-влакым каҥашеныт. Тыгодым ассоциаций вуйлатыше Арво Валтон палемден:

— Ты вашлиймашна чолга марийым, Миклай Рыбаковым, шарныме, тудын пашажлан вуйым савыме семын эрташ тӱҥалеш. Тунамак мыйым весе тургыжландара. Конгресс самырык автор-влак нерген тӱҥ йодышым увертарен, таче мемнан коклаште самырык-влак шукын улыт манын ойлаш ок лий.

Кечывал деч вара уна-влак Йошкар-Ола дене палыме лийыныт, тысе лудшо-влак дене вашлийыныт. Марий кугыжаныш университетын, Йыван Палантай лӱмеш культура колледжын, 14-ше номеран гимназийын, 18-ше номеран лицейын студент ден тунемшыже-влак сылнымут усталыкым таптыме нерген пален налыныт, автор-влакын лудмо почеламутыштым колыштыныт. Серге Чавайн лӱмеш национальный книгагудышто «Марий Элын эн сай книгаже-влак» ончер дене палыме лийыныт. А кас велеш «Ший агур» кафеште «Чоным почын ойлынем» сылнымут касыш чумыргеныт.

Зоя Глушкова.

Снимкылаште: венгр шымлызе Петер Домокошым В.И.Макаров вашлиеш;  Арво Валтон, Ева Тулуз, Еремей Айпин — ассоциацийын правленийыштыже.

М.Скобелев ден Д.Речкинын фотожо.

Налмывер: «Марий Эл» газет

1 комментарий

Filed under Артикль-влак

One response to “Йошкар-Ола финн-угор писатель-влакым вашлиеш

  1. МарГУ студент

    Кунам Макаров университетыште венгр йылмым туныкташ ту»н»алеш? Финн да эстон йылме специалист-влакымат аклен ыш мошто: иктыже ешыж почеш Сибирьыш кайыш, весышт-влак мо»нгешла Эстонийыш. Конешне ко»н копеклан пашам ыштымыже шуеш?

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s